詭唔詭異？ - 方卓如

2016年5月12日 - 信報

好耐未試過返屋企睇台慶，原來依家最好睇嘅電視，就係睇人點樣揶揄電視，詭唔詭異？

王維基話考慮參選立法會，參選目的只有一個就係要換特首。差不多每一屆立法會都會有個傳媒紅人出戰，大班、毓民，知名度夠高，基本上一出就贏。但係選到唔代表做到，選舉時候㷫合合，選完贏咗入到去，只係幾十分一，反而變咗普通人。四年之後唔連任，影響力仲唔及得選前嘅一介草民。立法會就係一個消滅個人魅力嘅攪肉機，完裝整件走入去，攪成肉碎面目模糊走出來，詭唔詭異？

負資產勝全身冇錢

《人民日報》訪問權威人士，坊間都話呢個權威人士就係習近平。只有大陸有呢個可愛，人人都知邊個講說話，但又唔需要露面話係自己講，有親身講嘅效果，冇現身說嘅責任，詭唔詭異？權威人士一錘定音，經濟運行係L形走勢，需求持續低迷，產能長期過剩。高槓桿是高風險，會引發金融危機，令老百姓儲蓄泡湯。「保人不保企」，唔會隨便債轉股，殭屍企業由得佢接埋，但工人要安置。

權威人士眼中係要照顧普通百姓，資本操作同企業老細就唔係要照顧嘅範圍。缺乏政府最後嘅支持，市場要自生自滅，近幾年都係股市下跌嘅主要原因。如果權威人士真係最高權力嘅化身，未來幾年中港兩地會進行洗牌式汰弱留強，你要做嘅就係企喺強者嘅一方。

有發展商為樓盤提供九成半按揭，基本上你肯供就得，即時做業主。九成半按揭，好易變負資產，但其實負資產唔及成副身家做首期咁恐怖。負資產，慳咗首期，有乜風吹草動，你仲有儲蓄可以供層樓，唔使割價求售。正資產，但係全身冇錢，全部畀晒首期，你係冇得守。

辣招之下，你係唔可以賣樓斷臂。有錢守，先係買樓嘅先決條件。九成半按揭，樓市先至可以避免割喉式劈價，詭唔詭異？