2016年5月9日星期一

政治正確先至唔正確 - 方卓如

2016年5月5日 - 信報

特朗普九成九會係總統候選人,是繼李斯特城奪得英超冠軍之後,另一件你難以置信但又真正發生嘅事情。

有腦嘅都覺得有冇搞錯,Donald Trump?你咪理,佢真係有美國人支持,仲要拋離其他正正常常四四正正嘅,而家連黨領袖都覺得佢勢不可擋,惟有團結撐佢。

點解Trump愈癲愈有機,愈係講嘢唔正常,愈得到美國人支持?明顯地美國人甚至全世界人都受夠了,文明社會要你包容要大同,但係眼見外人不斷侵蝕你嘅利益,大部分國家都開始右傾,反移民直情係核心思想。右傾搬到嚟香港,叫做本土。全球反移民保護本土嘅風氣,在Trump氣勢如虹之下達到頂峰,如果佢做埋總統,直情係右傾浪潮登堂入室,成為民眾核心思想。Trump嘅崛起,最恐怖唔係佢講嘅嘢,而家背後支持嘅人數同想法原來係蔓延甚廣。

李斯特城翻版

Trump最煞食嘅係,佢夠真。政治正確現世代一啲都唔正確,政治唔正確先講出大眾心底話。由佢對希拉莉,唔只係黨爭、意識形態之爭,仲係新舊之爭。希拉莉連個最老嘅黨內對手都未打贏,面對仲夠膽色嘅癲佬,唔好以為美國人真係會理性投票,總統係Trump只不過係李斯特城翻版,過兩日你就覺得實至名歸。

Trump夠真,公司有冇唔夠真?昨日講嘅公司道德,唔夠真嘅就唔夠道德,例如領展(00823)。領展行私人公司路線,股東回報至上,賣商場係商業行為;但唔好忘記,領展唔係白手興家,政府將公屋樓下獨市經營嘅商場打包上市,上市之後,依然係獨市,而幫襯嘅街坊不變。領展將資產改頭換面,外判兼出售,令幫襯開嘅街坊受損,同Valeant買藥廠然後加價冇分別。

Valeant畀股神鬧,領展抵唔抵鬧?

沒有留言:

發佈留言