唔上唔落先要頭痕 - 方卓如

2016年5月10日 - 信報

本欄嘅收視率在行內甚高，時不時都有人讓我知道原來佢都有睇。有人話我昨日寫得太灰，其實我只係寫個現實情況，毫無價值判斷。爆煲唔係我講，好多人上年年尾講到而家，只係講極都未爆，人類開始鬆懈。政府都唔會有方法阻止爆煲，亦冇能力去為爆煲善後，我哋可以做嘅，梗係準備爆煲後如何生活。最有錢同最窮嘅都唔使煩，你唔上唔落先要頭痕。

先減債　現金傍身

點準備？減債當然係第一位。連投行嘅打工仔，都沽咗層有按揭嘅大屋，換咗間唔使借嘅細屋，炒埋啲工人，就係為唔知幾時殺到嘅爆煲準備。如果好人好姐，無事無幹，買番大屋請番工人都未遲。

另外，連畢非德都話負利率之下，唔介意攞啲現金出嚟，擺喺床下底。佢有錢過你咁多，都想提現金，你只係有佢嘅零頭，點都要攞啲現金傍吓身啩。唔好笑，逢係有爆煲事件，政府第一時間會做啲乜嘢？就係防止銀行擠提。

以前只要政府拍心口，保證存款安全，存戶就放心，唔會走去搶現金。而家正正係政府借到爆廠，人民對政府冇信心，仲有邊個可以保證防止擠提？希臘又係最佳示範，停市停銀行，你有嘅錢只係一堆數字。攞啲現金傍身，到時你就明白乜嘢係現金為王。

希臘前日國會通過緊縮政策，引發示威騷亂。經濟危機最驚係觸發社會動盪，但往往社會動盪先讓政府有借口重手鐵腕解決經濟危機。97/98、2000年、08/09，近20年嘅金融危機都可以錢債錢還，和平解決，因為政府仲係有錢，可以擔任終極債主嘅位置。

而家終極債主成為最大債仔，係爆煲嘅主角，希臘就係一個示範。唔到你唔驚嘅係，如果有爆煲嘅一日，世界唔會學以往咁安然。