2016年5月3日星期二

示弱先至最強 - 方卓如

2016年5月3日 - 信報

黎明呢幾日俾人讚到天上有,已經唔使我再多講。留意,其實黎明冇做啲驚天動地嘅嘢,只係做返個正常人,有錯就認,唔去死撐、唔會賴人。呢啲做人嘅道理,你細個阿媽都日日教你。只係而家我哋日日見啲着西裝嘅爛仔無賴太多,黎明橫空而出,示弱先至最強,話俾我哋知香港原來仲有正常人,即刻當佢神咁拜,都分唔清應該係開心定悲哀。

香港原來仲有正常人

負資產個案比去季上升14倍,究竟係咪嚟緊係1997年嘅翻版?同1997年唔同,當年按揭成數比而家高得多,借八成九成同而家得六成,槓桿今時今日係低倍數。

出嘅本金多咗,負資產機會減少,所以唔會有破紀錄嘅負資產數字。但係正資產未必一定開心過負資產,就算負資產,只要你應付到供款,資不抵債並唔係世界末日。低槓桿嘅正資產,代表你成副身家放咗喺層樓度,佢可能係你唯一嘅資產。呢件資產,正處於下跌周期,辣招底下你無法出售,等於你將所有流動資產押注在並唔流通嘅磚頭,同你用成副身家買咗件古董冇分別,只不過你可以響件古董入面瞓。

唔流通嘅正資產,要沽,就要大折讓。亦即係話,你件賬面上正資產,實際上係件流通負資產,只不過市價未有計算層樓嘅流動折讓。而家嘅負資產數量,其實遠比統計出來嘅多。

美元向下,令港元資產價格下跌嘅壓力減少。但唔好忘記,三大市場係順次序下跌。先係股票市場,繼而樓市,最後係人力市場。前兩者下跌嘅殺傷力唔夠人力市場下跌嘅影響大。失業率上升已經成為趨勢,加上負資產,1997年嘅翻版其實慢慢浮現。

沒有留言:

發佈留言