5月一啲都唔窮 - 方卓如

2016年5月30日 - 信報

Warriors可以迫到打第七場，如果後來居上，贏到入總決賽，咁就真係不枉常規賽打破公牛紀錄嘅威勢。如果唔可以連贏總冠軍，仲唔可以稱為Warriors嘅王朝誕生，星期二返工又要遲到。

五窮六絕七翻身，如果呢兩日唔大冧，5月只係跌幾百點，一啲都唔窮。6月絕唔絕，完全冇路捉，幾百億成交，要上要落冇乜難度。

回歸A股　全因識玩

香港開始步向美股化，股市係專業人士嘅戰場， 散戶嘅參與同世界盃一樣，4年一次。只有大時代嘅環境來臨，散戶先至蜂擁入場。其餘時間，只有專門在股市搵食嘅人，先會參與股市。

內地公司全部都想回歸A股，唔理你係港股還是美股上市，都想退市返番A股。點解？唔止係因為A股估值較高，公司老闆更加熟悉A股市場先係重點。估值較高講得好聽，難聽啲係炒得更勁。但公司老闆唔係單純想炒得更勁，而係A股係佢主場，佢識玩。隔行如隔山，隔岸如隔世，雖然上市在香港，過條河就到，但係成個環境同老闆熟悉嘅地方係完全唔同。以前話公司老闆應該專心做生意，千祈唔好諗股票。今時今日唔同玩法，老闆要諗住自己股票。連政府係大股東嘅上市公司都話要同股東負責，股東最介意股價高低，所以老闆想唔睇股價都唔得。

上市公司股價又有好多環境因素影響，最唔影響股價嘅就係盈利。騰訊（00700）最近公布業績，較市場預期為好，股價反而下跌。星期五突然飆升突破大時代價，原因就話係「深港通」好快開通。See！你賺多咗錢唔會刺激股價，多人可以炒先至令股價上升，明未？老闆不停苦幹為公司賺錢，唔及出面搵人用錢買自己股票咁實際，更能為股東賺錢。