2016年4月27日星期三

一時Happy一時PK - 方卓如

2016年4月27日 - 信報

自從地球出現咗信貸呢件寶物之後,人類就可以利用作為累積財富同轉移財富。有咗信貸,經濟就可以超前發展,讓你提早享受本應負擔唔起嘅資源。亦因為信貸係有借有還,借嘅時候大家Happy,還嘅時候就一齊PK。一時Happy一時PK,文雅啲講就係經濟循環。

而家你覺得係到咗借嘅時候定係還嘅時候?咁你就知我哋應該係Happy定係PK。

債主變債仔 如殭屍咬人

中國個別企業投資級別嘅負債已經出現違約,還唔到錢嘅場面將會成為新常態。債轉股係將要還嘅債變成長期唔使還嘅股票,債主收到一手股票,其實係將麻煩由債仔轉移畀債主。次一級實力嘅債主,本來收番鈔票,而家變成股票,自己都搞唔掂,變埋債仔。

債仔唔使還錢嘅舉動,同殭屍咬完人一樣,令對方都變埋同類,債主變債仔。債仔愈嚟愈多,信貸泡沫想唔爆都難。

中國可以唔奉行西方民主,可以用行政手段干預股市,甚至可以打破經濟理論所講固定貨幣滙價、資本任意流動、貨幣政策自主三者不可兼得,但一時Happy一時PK嘅信貸周期現象,點都唔可能違反,除非中國發明咗借錢可以唔還嘅新規矩(可能真係發明咗)。你可以延遲PK嘅時間,正如你可以延遲返屋企,但你唔返屋企,聽PK。

港股由二萬八高位跌咗一萬點,反彈三分一就係二萬一,反彈一半就係二萬三,而家接近二萬二。如果你認為未來係壞事多過好事,而家就差唔多反彈見頂;如果你見美股回到萬八時,世界已經消化晒壞消息,而家就係擇肥入貨時機。你問我係好定係壞?

我話呢個世界已經癲到冇晒邏輯,唔係我哋呢啲手持咁少扎實資訊嘅人可以預計。

冇View唔會贏得盡,但至少唔會輸死人。

沒有留言:

發佈留言