最有霸氣人物 - 方卓如

2016年4月25日 - 信報

上星期最有霸氣嘅人物，唔使講梗係喬治小王子。仲邊有人咁沙卜，着住件睡衣去見總統奧巴馬？呢幅相他日必定重現江湖，就係喬治王子登基之時。但係最抵讚嘅，係佢老竇老母。佢哋冇要個仔執到正去見總統，人哋嚟你屋企作客，小朋友有自己作息時間，話之你係總統。比着係中國人，如果領導人話嚟你屋企探訪，全家由上至下，借都要借件老西撐場。

當然，人哋係皇室，係成世嘅身份，嚟嘅只係工作壽命最多8年嘅總統，小王子肯遲瞓15分鐘已經畀面你。

美股升吓升吓，道指已經升番上萬八點，經歷過加息、油價下跌、中國經濟硬着陸危機，咁多樣事前話係大鑊嘢嘅事情都對美股冇影響，你如果出門一年回來仲以為美股橫行足足一年。唔可以唔佩服美國人對金融財經嘅功力，全世界都驚會冧嘅股市，偏偏美國就可以若無其事。

再一次重申我所講，危機唔爆就等於冇，我哋呢代人係長期活喺危機之中，危機長存已經係新常態。你要分析嘅，唔再係有沒有危機、而家有沒有爆破。唔係有沒有爆破可能，所有危機都有可能爆破，呢樣阿媽係女人嘅分析對你幫助唔大。

下次爆大鑊冇得掹

估計遲早有日會爆，對你嘅幫助亦都唔大，因為過早估啱同估錯冇分別。噢，不對，係有分別，過早估啱輸得仲慘過估錯。估啱你會瞓身，估錯反而你會認輸。好似「Big Short」一樣，估啱嗰班早兩年前已經落重注，要捱足兩年畀人話你錯，其間輸嘅錢，你係唔會有能力捱到開估原來你啱。

下一次嘅危機爆破，規模應該大到全世界都一命嗚呼，窮嘅窮到燶，窮到要設法去搶有錢嘅。你睇而家美國總統選舉，年輕人最支持嘅，係年紀最大嘅Sanders。佢就係最憎啲有錢嘅，要向利益集團宣戰。

全世界年輕人失業率最勁，缺乏向上流嘅動力，但反而個個都不愁衣食，人人有iPhone。佢哋心目中要建構嘅世界，已經唔係資本主義社會，發展是硬道理。

搞多次金融危機，唔再係錢債錢償，用錢可以解決，會引發social unrest。你冇辦法阻止下次危機爆發，亦唔需要期望有方法為危機爆破善後。你可以做嘅，就係當冇事發生，繼續在爆發之前盡擸多啲資源。