千祈唔好讀咁多書 - 方卓如

2016年4月22日 - 信報

「方帥，又到星期五，有乜嘢可以點醒我哋啲做細嘅？」

「草蜢仔，你啱啱出嚟做嘢，千祈唔好怕蝕底， 有得做要盡做，但係有得賺就唔好賺盡。除非你諗住刮一筆即刻着草走佬上岸，否則的話，山水有相逢。

記住，如果你醒目嘅話，你應該使唔晒你賺嘅錢，唔使咁心急鋪鋪盡擸。仲有，呢一行好邪，有時候你肯跌啲，到頭來攞得仲多。貪係動力，但係唔使鋪鋪盡貪。不過好難，呢行要成功就要去盡，懂得收放自如，係道行。」

不要鋪鋪賺盡

「嘩，方帥，一嚟就咁高深，好難頂啫，有冇啲輕鬆啲嘅，都係想聽吓故仔啫。」

「最近失業率上升咗少少，唔好掉以輕心，係趨勢。經濟唔好，大家最驚嘅就係冇咗份工，而裁員減薪正正係經濟唔好嘅必然後果。

現代社會用工作嚟分配資源，用勞力去得到資源分配額，即係出糧。冇咗份工，即係冇得分配資源，正常人都會憂心。不幸地，失業已經變成已發展國家嘅新常態。原因好多，互聯網興起唔需要咁多人手，生產過剩又唔再需要咁多人手，科技進步更加消滅咗好多工種。將來個個都要識得寫Apps，就好似而家要識英文一樣。未來全部人都要做程式員，因為程式員以外嘅工作都係電腦同機械人做晒。咁多人冇工做之後，社會憑乜嘢去分配資源？我都諗唔通。」

「想輕鬆啲啫，你就嚇我話冇咗份工，誇唔誇啲？」

「草蜢仔，早識你十年，我就會勸你千祈唔好讀咁多書，早啲出嚟做嘢，食埋條水尾。你廿幾歲人，讀完書之後，出嚟嘅世界係元氣大傷，三日唔埋兩日又有危機，一鑊又一鑊蠶食你副身家，到最後連份工都無埋。如果早十年出嚟打滾，早啲出嚟捱，趁社會未畀我哋淘空，你仲有機會搵定啲水腳，而家就好艱難，要你好叻仔先得，可恨我識遲咗你十年。」

「嘩，十年又十年，聽你講成日都唔知你講乜，我走去食碗雲吞麵好過。」