2016年4月28日星期四

好難瓣瓣都精 - 方卓如

2016年4月28日 - 信報

機場行李運送事件,說明一支火柴都可以燒毁整個森林,小小事都唔可以掉以輕心,要開猛水喉務求即時撲熄柴火。全宇宙唯一唔會做錯事嘅神人,要保持任何錯事都唔關自己事,先要搞清楚身邊華文華武有冇一啲丟人現眼嘅言行,先至好出口推卸給別人。

原來有份報告清楚描述華文華武如何大鬧機場,全宇宙唯一唔會做錯嘅神人,一手推落去兩名女子身上,自己完全切割,好快就會冇事,兩名女子又唔會選舉,何況香港根本冇選舉,怕咩?要將永遠唔會做錯嘅光環擴大至身邊嘅人,要睇吓身邊嘅人有冇咁嘅道行。

好多人好醒,但唔係咁多人係瓣瓣都醒。聰明,除咗係先天條件,仲有睇你浸淫咗幾多時間。除非你骨骼精奇,出道奇早,自細開始涉獵不同範圍,未成年已經要出嚟打滾,否則你好難樣樣都精。

股票唔派息等如郵票

炒樓嘅人,思維同炒股票唔同。炒樓本大,有leverage,守得,有水出,即係有息收。

樓市經歷咗一個漫長嘅升市,期間任何時候買,只要有力守,基本上一定贏。炒樓,快又得,慢又得,由快變慢亦得,得咗。

股票就唔同。唔派息嘅股票基本上係郵票,試問有邊幾個識炒郵票?幾多個炒郵票會發達?炒樓慣咗可以守,郵票係冇得守,冇人要就冇人要。樓可以收租,郵票冇息收。樓可以按,郵票點按?好多人灌輸你股票係投資工具,呢個先係你輸錢嘅原因。只要你觀念正確,當股票係郵票,你就唔會夠膽死揸唔放,一到價錢嗱嗱聲放。

樓同股票仲有一個最大分別。樓,嚴格嚟講,每一間都係獨一無二,沽咗就冇。股票,冧把唔同,但升跌都一樣,同你出去揼骨,擰轉面趴底,咪個個冧把都一樣。樓你會有心頭好,唔捨得沽。揼骨,你唔會話㩜住一個冧把唔轉掛?

沒有留言:

發佈留言