識睇電視你有前途 - 方卓如

2016年4月12日 - 信報

昨日星期一係返工遲到嘅高峰期，因為由星期日下晝開始，運動迷幾乎可以連續睇電視20小時，冇得瞓。

首先睇Ruby Seven，香港隊可以殺入資格賽決賽，最後打到冇力，輸畀日本隊。睇完晒ruby，到足球，李斯特城要向冠軍進發，結果又贏一場。有得睇快啲睇，李斯特城下年一定係車路士翻版，冠軍之後變成護級。完場後又到熱刺對曼聯，睇吓李斯特城要贏三場定兩場就攞冠軍，結果都係要三場，曼聯只係得個龍門，其他十個全部都係廢柴。

睇完足球，MotoGP又開始，同時間the Masters又開波。最慘係，MotoGP夜晚三點開賽， Jordan Spieth就兩點九tee off，轉台轉到手軟。MotoGP半個鐘頭多啲就賽完，羅斯第二個圈就飛咗出街，Ducati車手連續兩場畀人掃跌，馬奎斯又贏一場。賽車睇完，Jordan Spieth打到第二洞。頭九洞睇怕佢可以成為第四個成功衞冕嘅冠車，對上一個係Tiger Woods。點知人類自毁長城係可以超越想像的，Jordan Spieth第十二洞災難性超四桿，一手將冠軍奉送畀Danny Willett。

睇到呢度，18小時睇到暈，未完，最精采而家先到。食個杯麵，Warriors對Spurs。19年來， Warriors未試過喺Spurs主場贏波，要超過公牛72勝紀錄，今次一定要作客贏波。上半場兩隊都係得35分，唔識射波，下半場先發圍。給果係，星期四朝你又要偷懶，睇Warriors破紀錄，同埋睇Kobe Bryant收山。

高手低手　年齡關鍵

唔同嘅運動，睇得出人生預計唔到嘅起跌。足球、籃球、欖球、高爾夫球、賽車，一次過睇到飽，講到呢度，你明白點解要遲到返工。

植入廣告第一大原則係乜嘢？就係一開波就要畀你知佢就係植入廣告。毛記電視推出大量植入廣告，獨孤一味改歌詞。佢哋不但冇掩飾係廣告，反而開宗明義，令你好奇睇佢今次點玩植入，一次未夠仲要睇多次。佢哋唔單止玩歌詞，連產品都玩埋，令你唔討厭賣廣告嘅產品。咁嘅廣告，未玩到殘之前，work。其他失敗嘅植入，最討厭嘅係扮唔係廣告，睇到最尾時候，終於現真身，令你感覺畀人呃咗全場，以為佢寫緊什麼深度文章，成篇文最後都係畀人掉。高手低手，原來係有年齡分別。後生仔知道乜嘢叫明目張膽，最緊要冇呃你，大家開開心心，你睇得開心佢賺得開心。老人家就以為植入就係要收埋，遮遮掩掩，唔好畀你咁快知係廣告。呃呃氹氹，老嘢所為。

邊個話睇電視冇前途？識得睇，學到嘢。