唔綁住青春仲頭痕 - 方卓如

2016年3月8日 - 信報

中國外滙儲備2月只係少咗唔夠300億美金，比起1月唔見咗近1000億美金大幅減少。如果數字準確嘅話，人民幣貶值嘅壓力又細咗，中國要崩盤嘅危機紓緩咗。危機唔爆就等於冇，冇危機，咁第二季開始又可以炒過。

中國係目前為止可以同時擁有固定滙率、貨幣政策自主同資本自由流動嘅國家，三者本來只可以取其二，中國就三樣都有。

有層樓要穩穩陣陣

事實上，資本喺無管制下被管制，例如銀聯卡境外買保險受限制，固定滙率係靠龐大外滙儲備支持，表面上三樣都有，實際上只係半桶水。而家全國資金被引導去炒樓，將來會變成乜嘢世界，幾時會爆，睇得準又守得到嘅，你會發達。

大學校長都加入呼籲唔好為層樓而浪費青春，如果年輕人聽教嘅話，就唔好怪佢哋搞搞震。買樓係最能夠令人貼貼服服，乖乖地聽話嘅最佳手段。買樓嘅先決條件，就係要孭一身債，否則點會有樓？一身債，即係孫悟空頭上嘅金剛箍，邊有得畀你發圍？諗起每個月都要供樓，你自然會喪失鬥志，變得穩穩陣陣，一切以有錢供樓為大前提。

上一代人以最懶嘅方法，返工放工出糧供樓，捱過30年，個個都可以臨老唔使做，仲可以逆按揭每個月有使費。呢個模式雖然喺廿一世紀已經唔work，但係好多人一時間接受唔到，希望仲可以偷到雞，照辦煮碗。

你叫年輕人唔好再學上一代，要行條新路，即係除咗孫悟空頭上嘅金剛箍，可以用腦，咁就死得。稍為用腦嘅人都見到而家香港愈嚟愈唔掂，只係差在敢講定唔敢講。

新加坡最成功就係鼓勵市民唔好用腦做順民， 用層樓綁死佢哋。冇咗層樓，冇一身債，年輕人乜都唔驚。叫後生仔唔好畀層樓綁住青春，唔代表佢哋肯用佢哋嘅青春讓你消費。唔綁住佢哋嘅青春，你仲頭痕。