大股東向你呼喚 - 方卓如

2016年3月7日 - 信報

接連有細價股插水式下跌，坊間熱烈討論如何發現插水股，大多都說從大股東押股着手。不過，大股東押股唔一定要話你知，而大股東手上真正有幾多股票，你都唔一定知。視押股作為啟示，你係避唔開插水股的。

其實，插水股係唔使發現嘅，唔買細價股就得。只要你唔掂細價股，佢插水都唔關你事。但事實上，喺香港你唔可以唔掂細價股，如果細價股眼尾都唔望，你都唔使喺香港買股票。

大價股佢唔會一日跌去七成，唔會大插水，但唔代表唔會慢步落山，同樣可以輸死你。細價股一入場你就開始驚，你唔會瞓身，除非你認識大股東，俾佢說服你將來會有大搞作，令你心甘情願瞓身，另作別話。否則，細價股你只會投放零用錢。

大價股都可輸身家

大價股唔同，你覺得穩陣，有息收，唔怕長期持有，你會一半身家瞓落一隻大價股。當大價股拾級而下，息率上升，你仲會俾自己藉口加碼「趁低吸納」。時間一長，當你發現大價股原來無復當年勇，你已經輸咗一截身家。

滙控（00005）、渣打（02888）、思捷（00330），幾多大價股原來可以輸你更大銀碼，唔使我幫你一一去數。

細價股不可不理

細價股有爆發力，細價股變大價股嘅過程，先可以幫你致富。騰訊（00700）、銀娛（00027），未去到今天市值之前，都係由細價股起步。而家買樓唔會發達，你要夠錢退休，無可選擇地你要留意細價股。

既然唔可以偷懶閉上眼唔睇細價股，點先可以避開插水股？好簡單，我講過，只要大股東唔等錢使，無論大價股細價股，股價都唔會下跌。

「唓！咪即係大股東押股囉！」錯，大股東等錢使，唔一定要押股，要押股嘅大股東代表佢無實力，有實力嘅大股東，股票即係鈔票，係唔使押。

「咁點知大股東等錢使？」我諗咗好耐，一般市民的確唔會知道，因為現行你能夠眼見嘅事實，都唔可以準確話你知大股東等錢使。為免你覺得我寫完一大輪好似乜都冇講過，惟有用最貼近民間嘅方法簡單講一句，本來你買唔到嘅股票，突然間你買到，就代表大股東正在向你呼喚，因為佢等錢使。