2016年3月1日星期二

危機唔爆就等於冇 - 方卓如

2016年2月24日 - 信報

渣打(02888)嘅業績比滙控(00005)更差,證明2015年銀行的確好大鑊。渣打歐洲蝕得最勁,收入下跌,爛賬急升,同市場上估計銀行經營慘淡一致,只係更勁。美國、歐洲、日本、中國、產油國,全部都有自己嘅問題,全部都係危危乎。

危機呢樣嘢,唔在乎佢有沒有,只在乎佢爆唔爆。有危機,唔爆,咪即係冇。你生活喺一個又一個泡沫,經歷一個又一個危機,咁嘅道理你仲唔明?歐債危機解決咗咩?而家都冇乜人講,德國國債仲畀人搶購到變成負利率;日本衰落咗四分一世紀,成為全球引以為戒嘅通縮教材,係經濟學家要避免重蹈覆轍嘅國家。但係世界有乜風吹草動,日圓即刻變成避險貨幣,大家爭住買。

你睇,危機同滙率一樣,相對而已,你同其他對手一齊坐喺超載嘅舢舨,邊個跌落海先就瓜得,其他人就得救。而家中國係最後一個未爆嘅國家,好多人買重注佢信貸爆煲,但係只要歐洲、日本、產油國是但一個爆先,中國嘅危機又可以擺埋一邊,當佢冇到。

跟眾人悲觀冇發達

中國未必有能力令危機消失,但芸芸咁多個國家,中國最有本事令危機隱形。渣打滙控盤數都顯示歐洲唔係好掂,內銀公布業績時,你未必見到內地信貸有如外國對沖基金所言咁差。

既然危機嘅嘢唔爆就等於冇,你唔好睇得太淡。經濟差唔等於股市差,我哋一生都會生存喺危機之中,所以你跟隨大部分人悲觀係冇發達,反而大部人悲觀嘅時候你樂觀咁就有運行。萬一你啱,想唔發都難。萬一你錯,反正大家都係輸到褲甩冇飯開,一齊捱窮,又有乜分別?香港人喺呢啲逆市環境就係專家。點解?香港咁多荒謬嘅事情,大家都已經麻木了。

全世界瀰漫悲觀情緒,香港人比全世界更早冇感覺,開始唔驚,識得要搵機會執平貨。

沒有留言:

發佈留言