留啲畀下一手 - 方卓如

2016年2月23日 - 信報

滙控（00005）係世界級銀行，佢業績唔多好，證明全世界嘅銀行都難做。滙控第四季成績最差，亦即係全世界開始冧價嘅時候。遲啲到內銀公布業績，你可以比較吓，究竟資產冧價，對內地銀行有幾大影響。唔一定同滙控睇齊，隨時壞賬冇大幅飆升，表示全世界銀行生意難撈，內地銀行都可以有本事逆周期而行。

4年前我去過台灣睇總統選舉，當時馬英九係威係勢。由高雄睇到上台北，佢哋啲造勢晚會，有啲似街坊神功戲乘涼晚會，擔凳仔，有飲有食，背景音樂一定播住襯底，一到台上語帶激昂，音量即時推高。你咪話，真係牽動情緒，覺得已經贏咗。台式造勢晚會已經吹到嚟香港，一樣係音樂襯底，台上表現。而家只係小試，到9月，肯定有更精采嘅造勢大會。香港係咪會學足台灣？議會衝擊已經學緊，下屆衝擊嘅人多咗，肯定更激；台灣有時代力量，香港下屆都會有時代代表，必定會有打破年齡紀錄嘅議員出現。第三條路，咪就係泛民建制以外，呢啲年輕嘅，冇跟過任何大佬嘅素人囉。

當年四仔主義　單純直接

佢哋唔係中間，中間根本冇任何空間，第三條路係完全另外一個空間，根本唔玩傳統老嘢嗰一套。佢哋雖然出世比較遲，但係成熟過好多讀書多過佢哋，年紀大過佢哋嘅中坑。你睇補選辯論就知，中坑連講說話都口窒窒，眼眨眨，鬼鬼祟祟，後生仔一句就KO你，說話流利自信。

我愈睇愈心噏。大學生，想當年，我哋青春少艾嘅時候，四仔主義，諗住第時點搵錢，買車買樓娶老婆，單純直接，由冇到有，過程就係嘆世界。而家啲大學生，叻過我哋當年百倍，佢哋係要諗三十年後點算，仲要擔心埋呢個地方以後點算。佢哋講得啱，佢哋拋個身出嚟博，我哋呢班港豬就坐享其成，印印腳。我哋可以唔同意佢哋嘅手法，唔同意佢哋嘅主張，亦可以怕佢哋亂咁搞最終會影響到我同你，但係你唔應該以一種趕絕佢哋，滅佢一生嘅惡毒心態對佢哋。如果你遲投胎二十年，唔擔保你唔喺旺角出現。你今日有嘅嘢，部分係前人打江山留畀你，唔係你自己叻仔，你好應該留啲畀下一手。