從來活在危機之中 - 方卓如

2016年2月25日 - 信報

同樣係做官，財爺講嘅係人話，全城即刻皇恩浩蕩，直情好似希伯來人遇見摩西，等佢打救，由佢做特首咁就一天都光晒。唔好話香港人坎坷或要求低，有人走出嚟賣口乖就眼前一亮。畀人折磨虐待咗3年，搞到大家人唔似人、鬼唔似鬼，識講人話嘅官，我哋以為已經一早絕晒種。財爺快啲開Facebook，唔係畀人like你，係畀人睇你like乜，咁就知你係賣口乖定真材實料。

早前講過美國、歐洲、日本、中國、產油國，全部都有危機，問題係邊個爆先，雖然爆先嗰個都會拖冧全世界，但未爆嘅就等如危機唔見咗。咁你估邊個爆先？產油國差唔多全部都係單一出口，唔賣石油都冇嘢賣，點減產？最弊係伊朗解除禁運，佢咁多年都未賣過油，冇賣油收入，都係日復日咁產油。而家可以賣，賣得一蚊都係賺，點會減產？委內瑞拉，接近全國破產，唔賣油，饑荒都似，點減產？油價可以由高位跌近八成，全球需求冇減少八成啩。所以炒賣活動同實體經濟係息息相關，千祈唔好再迷信咩埋頭工作、不作炒賣，唔係嘅話你突然畀人炒咗都唔知咩事。

對沖基金成日錯

中國而家做緊經濟學實驗。一個國家，只可以在貨幣政策自主、固定滙率、資本自由流動，三者選擇其二，不能三者兼得。中國絕對係貨幣政策自主，降息降準，想點就點。剩低嘅係，究竟要滙率穩定還是資本自由流動？而家好似兩者同時兼備，對沖基金賭佢滙率頂唔住，外界又估遲早資本管制。如果中國最後三者俱備，不但只係經濟奇蹟，經濟理論都要改寫，攞諾貝爾獎嘅Robert Mundell都要被搣柴。

提一提大家，雖然對沖基金落重注買人民幣貶值，但係對沖基金成日都錯。寫咗十二版紙話中國唔掂嘅Kyle Bass，佢有隻基金係專同藥廠打官司，話佢哋嘅專利無效。若果勝訴，股價必定大冧，沽空嘅就發達。最近呢隻基金已經退番錢畀投資者，失敗收場。危機唔爆就等如冇，你見到有危機所以諗住贏，隨時輸凸。記住，你有生之年，從來都係活在一個又一個危機之中，香港尤甚。