2016年3月2日星期三

銀行唔一定可靠 - 方卓如

2016年3月2日 - 信報

日本嘅負利率唔單只出現喺二手債券市場,連發行價都開始負利率。最近日本拍賣10年期債券,一開波就係負孳息率,令所有大型退休基金同埋銀行都唔敢參與拍賣,只係得沽空咗日本債券嘅基金走去買貨補倉。長期債券都變成投機工具,唔俾你偷懶長揸收息。

點解負利率嘅債券都有人買?答案其實唔難理解,只係大家唔習慣債券嘅報價係用孳息率,而唔係實質銀碼。你買股票好多時都係負孳息率,冇息派不特止,仲要跌價,仲唔係負孳息率?殺頭生意有人做,蝕錢生意先冇人做,肯買負利率債券,表示醒目資金寧願殺頭。

負利率國債都可以贏

負利率債券一樣可以幫你賺錢,只要你可以响負利率更勁嘅時候沽出,表示債券價格進一步上升。另外,沽售資產後嘅現金都要搵地方存放,你可以擺喺夾萬或床下底,亦可以俾少少手續費,搵人幫手存,即係負利率。點解唔放喺銀行?銀行可以倒閉,到時渣都冇。唔係杞人憂天,當年雷曼倒閉,有放資產喺雷曼託管嘅基金,如果有一成資產投放,即刻輸一成。銀行而家係下一波金融危機嘅風眼,有乜風吹草動限制提款,一啲都唔出奇,希臘已經示範過。

買國債,唔驚佢走佬,最安全。負利率嘅債券, 係理智嘅產品,醒目錢肯買,唔係諗住輸,係想贏。

銀行有幾不濟?親身經驗。我有一間公司,經營多年,一直用緊滙豐銀行。可能滙豐俾人告得多,早前空群發信要客戶提供資料,已經不勝其煩,仲要多次親自到銀行交資料,以免掛一漏萬。殊不知,近日戶口在毫無通知下無聲無息被取消,原因係欠缺一張身份證副本!戶口多年冇轉過俾任何人,開戶口嘅身份證同而家會有什麼分別?公司做生意,戶口可以沒有通知下突然取消?做生意要銀行過賬往來,取消一個公司戶口係可以影響人家生意,難道廣告話幫人做生意嘅滙豐會無知至此?受銀行氣嘅人唔止我一個,銀行應該係僅次於香港政府嘅市民討厭對象,你睇吓邊個响立法會代表銀行界就知。

時勢唔同,現在生活千祈唔好用以往行之有效嘅思維,買樓唔一定發達,滙控(00005)唔可以長揸,銀行唔一定可靠。負利率,唔一定冇錢賺。

呢個世界,係咪好難適應?

沒有留言:

發佈留言