一個時代嘅終結 - 方卓如

2016年2月26日 - 信報

2月25日，周四。以後冇得睇曹仁超，一個時代嘅終結。未有互聯網之前，報紙係主要讀字嘅來源。以前冇咁易睇到鬼佬報紙，曹仁超寫成版幾乎成為了解世界財經發展嘅唯一途徑。佢最值錢嘅地方，係因為佢有番咁上下年紀，經過幾個高低浪。由佢講而家嘅世界點同以前比，特別有說服力。而家唔會有人寫三四千字，流行網上發表短小精悍嘅感想，一個point，寫完收工。最紅嘅網上寫手，全部後生仔。後生仔老氣橫秋，講到自己看透世情，但係佢自己當年都未出世。

曹仁超寫嘅嘢好多而家仲啱聽。「年輕人唔好俾五百呎縛住自己嘅青春」，呢句說話年輕人應該要捧為金科玉律。只有香港先會有買樓作為人生目標，俾人由細到大洗腦，由曹仁超點醒你，最佳人選。

細價股狂瀉　搵大股東算賬

每個人都想提高自己生活質素，但今日喺香港買樓反而最能夠降低你嘅生活質素。「有智慧不如趁勢」，啱，不過要懂得趁勢，你都需要有點智慧，否則你睇錯趨勢，輸到你甩肺。

細價股最近跌七八成閒閒地，原因只有一個，就係大股東要錢唔要貨。冇大股東嘅公司，唔會突然跌七成。

渣打（02888）業績咁差，點跌都係拾級而下，因為大家有睇淡有睇好，跌得有序。急跌嘅，一定係有一個持有大倉嘅人，不問價錢狂掟。呢個人通常係大股東，只有佢有大倉，兼且成本最平，有條件狂掟。如果係非大股東，又係持貨大戶，佢掟，只要大股東唔等錢使，佢會接。所以，只有持大倉嘅大股東等錢使，先會出現跌七成嘅現象。股價狂跌要捉鬼，唔使周圍摷，上去搵大股東算賬就得。