回到用腦年代 - 方卓如

2016年2月11日 - 信報

今日唔使點寫啲行貨拜年說話，直入正題。今日亦都唔使估黑盤定紅盤，必定大冧。

鬼佬新年一開始就跌，唔多老黎；中國新年後仲衰，大冧市。火猴年好貼切，紮紮跳，喺樹上面一跳到底，然後彈起，弊在底喺邊同彈幾高冇人知。

全世界已發展國家嘅國債，有四分一已經係負孳息率，即係揸到尾嘅話，要蝕錢。買得國債嘅錢， 全部都係聰明錢，否則就唔會識得走去買國債，學你一樣淨係買股票，股價潛水就當長線投資，又或者存入銀行唔理。負孳息率唔等於負回報，只要繼續有人肯用更高價錢幫佢買，負孳息率一樣可以有正回報。但係負數嘅yield都肯買，除咗係Mandate限制唔揸得太多現金之外，就只係因為市場上沒有比國債更好嘅投資。

一個月前我問市場中人，佢話大家係悲，不過未驚；一個月後，相信愈嚟愈多人開始識驚。驚係好事，因為驚先至會向底進發，要到底先可以引人入場。而家等緊爆煲事件發生，未有一兩單令人愕然崩潰嘅新聞，未叫到底。

由悲到驚係好事

香港人最要用腦嘅年代，其實係首富當年白手興家嘅時期。自此之後，香港人開始舒服，改善生活水平順勢自然，正所謂環境迫你發達，陳冠中都話佢嗰代人幸運到不自覺。打工儲錢買樓，股票長揸收息，呢兩條橋唔使你用腦，有份工坐得印印腳幾十年就發達。而家？冇呢支歌仔唱，買樓唔可以發達，要發達先可以買樓；股票唔可以長揸，滙控（00005）渣打（02888）係最好例子。香港人家陣要動好多腦筋，諗到頭都爆，先可以搵到兩餐晏仔，唔似舊時咁舒服。

最辛苦嘅，其實係而家啲香港讀緊書嘅大中小學生，佢哋最慘。呢幾年所有嘅衰嘢都係衝住啲後生仔佢哋嚟，30年前傾香港前途佢哋未出世，而家傾佢哋自己嘅前途又冇佢哋份，我哋呢代人將香港舐乾舔淨，佢哋咁早就要諗自己將來點算。回到首富當年要飲魚湯吸新鮮空氣醫肺病嘅時勢。每代人都要思考同爭取自己嘅生存方法，只不過40年來我哋唔使點煩，舒舒服服。而家開始，大家都要用腦。