2016年2月18日星期四

股市可以影響實體經濟 - 方卓如

2016年2月18日 - 信報

東亞銀行(00023)宣布業績,收唔番嚟嘅爛賬增加一倍,搞到業績倒退。其他中資銀行陸續公布業績嘅時候,未必同樣出現爛賬增加以倍計嘅情況。東亞响大陸借錢畀啲私人企業,冇錢還好正常。中資銀行借錢,係借畀國企。國企唔還錢,可以轉條款,攤長還,甚至再借大啲遲啲再還,國家級嘅借貸可以唔還但唔會變壞。

債仔少咗攞錢工具

再講,一筆賬,爛與唔爛之間,係有好遼闊嘅空間,等於從十億光年前,最近才嚟到地球俾你發現到嘅重力波咁廣闊。邊個咁夠薑喺中資銀行埋數期間話國企係爛賬?所以,東亞嘅業績對往後中資銀行成績表係冇指標作用。

點解銀行爛賬多咗?原因係股市下跌。無錯,股市同實體經濟好有關係,將來如果有上市公司管理層話,自己唔理股價,只係埋頭揼石仔,你可以拋售佢嘅股票,因為佢唔係講大話就係唔識嘢。股市好,公司股價有表現,投資者熱烈,隨時可以批股攞錢,無論新股舊股,公司或大股東都有着數,唔會手緊。股市唔好,批股不成,大股東只可以押股借錢,自己用或者幫公司周轉,都係最後手段。股市愈跌愈有,斬倉,公司都冇埋,遲早打交。最近你見到一仙批股,股票報失,就係股市下跌嘅結果。

所以話,股市下跌其實唔只係紙上富貴,實體經濟都會受影響。銀行啲債仔少咗一種攞錢嘅工具,自然爛賬急升。財富轉移之後,資產落入強者手中,又可以翻生再嚟過。而家資產價格下跌,除咗係斬倉之外,有實力嘅人都係要錢唔要貨,等待滿街平貨嘅時候慢慢執。你唔好因為跌市而離場,反而要日日睇實,睇吓有冇平嘢執。

沒有留言:

發佈留言