2015年11月6日星期五

玩手機都可以做生意 - 方卓如

2015年11月6日 - 信報

「方帥,又到星期五,再講吓你啲放工前後嘅生活啦,反正你都冇乜嘢好寫,又唔畀冧把,又冇堅料爆,又唔再攞啲公開資訊把玩一番,學人哋將啲一手資訊變成二手分析,直接啲教我哋實戰經驗最好不過。」

Well,我最近見到唔少小朋友讀完書番嚟,想加入金融業呢一行。起步點不外乎專業範圍嘅律師會計師,又或者打真軍嘅股票或保險經紀。無論你喺邊度起步,最緊要唔係去識多啲嘢,係要識多啲人。從來未試過有而家嘅環境,可以畀你短時間識得最多人之餘,仲可以不費吹灰之力能夠維持到。

低成本建立人脈

以前你攞咗人哋卡片,甚少可以在沒有特定話題之下打電話畀對方,無人會喺工作時間同個三唔識七嘅人傾電話吹水。

你一年幾次最常用嘅維繫方法,係過時過節送禮同埋寄聖誕卡。你要建立一個緊密嘅工作班底合作夥伴,花好多實際嘅工作機會同戰鬥場合,關係是逐點逐點打出來。

而家唔同,有微信,見面之後互換微信係指定動作。你在微信上管理自己嘅定位,引起朋友圈注意,灌輸一個特定嘅形象畀各相識,易如反掌。你唔需要日日飲茶灌水,只要日日有微信發放,每個人都被強迫要日日注意你一次。每日起碼一次在人哋嘅眼前出現,點會唔知你係邊個,點會唔被你塑造嘅形象洗腦。低成本方法去建立人脈關係,目前係空前地容易。

唔好睇小呢啲細水長流、每日滲啲滲啲嘅洗腦訊息,當你睇得多,到某日真正碰面,你自然好似大家識咗好耐,有共同話題,仲可以跟進人哋過去嘅經歷。人類係咁奇怪,當你在某些媒體經常見到某人,到你見到真人,會不自覺地有種說不出的興奮。

認真,玩手機都可以做生意,低頭族唔代表係廢青。上一代有上一代嘅人脈管理辦法,某富豪口袋有本簿仔,記錄低佢相識嘅人嘅家人名字,見人前會問身邊嘅人知唔知對方家人如何如何。而家唔使簿仔,見人前去人哋微信或者facebook,你一定找到話題。萬變不離其宗,新科技有新科技的求財功用。

「方帥,唔好講咁多,交換個微信先。」冇問題,有前途,一點就明。

沒有留言:

發佈留言