2015年11月30日星期一

企業最佳代言人 - 方卓如

2015年11月30日 - 信報

一間企業最厲害嘅代言人,就係老細本身。企業做到幾叻,你除咗睇到一大堆數字、賺幾多錢、市值幾多之外,你對住大部分企業都係印象模糊。只有嗰啲老細係人所共知,佢哋性格鮮明,變相賦予企業生命力,你對企業會有具體形象,繼而對企業嘅生意有幫助。與其高價使錢搵代言人,不如老細自己諗辦法突出自己,頂埋代言人個位。

最出名嘅代言人,你一定以為我會講係Steve Jobs。佢係勁,不過佢要做嘅嘢,都只係上台講幾句,搞到fans嘩嘩聲,整體上都叫做容易。Virgin嘅Richard Branson用自己嘅命仔,玩快艇玩熱汽球,歷險形象令到佢寶號專係做啲已經有行業大佬嘅生意,變得理所當然。客仔唔會覺得佢冇實力,反而覺得幫趁佢就等於自己唔甘於接受主流,同樣愛冒險。人好多時候唔敢做嘅嘢,係唔介意支持人哋去做。用命搏,做企業代言人,Richard Branson屬頂級。

香港本來一池死水,企業代言人唔係咁多,最叻就係無為而治,或者全公司走去跑步。最近我成日見到一田百貨,四方八面都講佢,我諗,佢嘅主持人做到一個叫人討好嘅形象,為一間平平無奇嘅百貨公司,變咗香港人創意製造嘅本地良心企業。

百貨公司最有需要

百貨公司其實最需要代言人,而且特別難培養代言人,因為做市民嘅生意,通街都係,平啲就得,唔使點講形象。你街口間超級市場,唔係白色就係黃色,你有幾何關心邊個係主持人?只要佢平兩毫子,你就會仆到去入貨。一田嘅主持人,走文藝路線,出書,講出自己顛覆傳統概念嘅經營方法,呢一下已經受傳媒愛戴。再就唔同熱門話題講出唔係一般阿媽係女人嘅評論,又行出了一步。傳統嘅百貨生意有一個唔傳統嘅主持人,形象鮮明,企業已經變成客人要搭車去睇睇嘅境界。突然間出現多咗嘅亮相機會,一係有嘢想做,一係時來運到,邊樣至真?

沒有留言:

發佈留言