2015年11月16日星期一

八成都係債仔 - 方卓如

2015年11月13日 - 信報

團結香港基金建議,公屋推出市場賣,以極筍補地價優惠,誓要全港八成業主。似曾相識?係,不過唔係你咁諗,唔係八萬五借屍還魂,係重演美國次按爆破。

經濟循環盛衰係由乜引起?就係由借貸引起。借得勁嘅時候經濟蓬蓬聲,借無可借要還就變經濟衰退。八成人係業主等如八成人係債仔,住公屋嘅餐搵餐食,要佢哋孭起一身債,份工有乜問題,供唔起,銀行「啪」咗層樓,你趕佢哋瞓街?全民皆借,信貸膨脹,整個城市嘅經濟命脈繫於樓市。諗來諗去,以為有乜新橋救香港,依然係貫徹洗腦,谷人買樓。

股市透明過樓市

樓市嘅透明度低過股市,所以做市mark價易如反掌,一單殺價成交,就可以拖冧成條村。從來冇人質疑過,樓同股票係完全唔同。股票係統一產品,你張股票同我張股票一樣,所以同價。樓係單一產品,件件都唔一樣,唔應該同價。不過,除咗凶宅,大家都係攞同一個呎價嚟參考,用同一個價嚟討價還價。結果係,升市時樓價可以愈mark愈高,跌市時樓價就會愈殺愈低。

股票跌到某個超筍價,就會有人貪心入市掃貨,托起股價。樓價跌到超筍價,反而叫人貪心再殺低啲,再推冧一步。傳媒不斷報道個別殺價成交,各界合力唱淡樓市,用力過猛,好快令樓價失速下跌,遲早唔止拖冧唔透明嘅樓市,連透明嘅股市都冧埋。

郊野公園應唔應該用嚟起樓?注意力唔應該喺起樓呢部分。要喺郊野公園動土,城市應該逼到冇氣唞,你一個月去唔到一次嘅郊野公園,大概幫唔到你。

你唔發覺街上面愈嚟愈多左軚車咩?右軚車可以上大陸,有借有還,左軚車都可以嚟香港。香港人可以上大陸發展,內地人一樣可以落香港搵食。城市負荷,唔止係房屋問題咁簡單。不過,負荷問題係本土派嘅主要議題,一涉及本土就變咗死罪,冇人敢認真討論下去,又變番房屋問題。堅守郊野公園,其實係逼政府唔好迴避城市負荷難題。

沒有留言:

發佈留言