2015年11月12日星期四

中國式創意殺到埋身 - 方卓如

2015年11月12日 - 信報

中國人學咗鬼佬嘅絕招,創造節日催谷消費。光棍節變成購物日,開派對現場直播網購銷售數字,有咁嘅power,咪可以反告賣GUCCI假貨都係GUCCI嘅問題囉。

唔可以話中國人冇創意,諗到咁嘅答案嚟駁嘴,被告變原告,呢啲就係中國人嘅本事,香港人你都聽唔少。遲啲連你都會學識點樣被告變原告,做錯反而仲惡。創意用喺生意方面,一樣遇神殺神。你諗番15年前科網熱潮,全世界都話網購喺中國行唔通:信用卡唔流行,人與人之間冇信任,地方咁大送貨昂貴,人哋可以成功嘅元素中國全部欠奉。你點估到今時今日,一天嘅網購營業額,勁過美國感恩節?

中國可以變成世界第二大經濟體,搞到要向外輸出生產力,唔係因為人多,係因為聰明人多。

中國式創意,主力係解決困難,唔係無中生有。而解決問題嘅創意,唔係天生,係環境逼出嚟。人哋話冇得搞嘅網購,中國人就可以度得掂,唔使用信用卡,保證你收到貨,重會衍生到物流嘅巨無霸。呢啲絕橋嘅創意,就算你Steve Jobs托世,空降落去中國,你都唔會度到。

成日叫啲後生仔北上發展,就算你幾叻,都唔會夠地膽鬥。喺中國搵錢要靠人脈靠解困,香港人兩瓣都唔夠大陸人鬥。中國式創意,無論係駁嘴同做生意,都殺到埋身。你唔使咁高深去諗Steve Jobs啲橫空出世嘅真貨,諗吓低檔次啲淘寶賣假貨,送到貨已經夠你賺。雖然賣真貨市值大過賣假貨,但係你要知天命,做生意要切合中國式創意,唔好強求原創一部iPhone,你最多整部平價翻版小米出嚟。

我師傅教我,做生意尤其係金融呢行嘅第一要訣,到而家我都做唔到。係乜?唔好信人。金融呢一行全部都係講錢,一講錢,兄弟都冇情講。你睇吓鏞記,信人而搞到輸錢嘅場面,我見唔少。我做唔到,始終下下唔信人,好多嘢唔使做。呃我一次,你叻仔;呃我第二次,就係我蠢。我惟有限制信人而結果不似預期嘅次數,千祈唔好容許自己蠢。

沒有留言:

發佈留言