如何在戰爭中生存 - 方卓如

2015年8月14日 - 信報

經濟係為政治服務，政府要經濟好，人民豐衣足食，係唔想佢哋食唔飽作反。如果唔怕作反，政治權力考慮就係最終目標，出手影響到人民生活質素只不過是為國家効力，應份。

所以任何經濟政策，一舉一動，唔好單純諗到只為搵錢，可以同錢無關。

你唔會估到阿爺點解突然要人民幣貶值，但你要去估人民幣貶值對你有乜影響。阿爺將人民幣貶值都未必一定令內地人財富增長咗，港紙企喺人民幣對面，你面對嘅情況更加會係中國好香港差。而家同1997、98年一模一樣，樓價超高。四百呎嘅細價樓，樓價對收入比例係16倍，97年係11倍；一千呎豪宅而家係12倍，97年係10倍。

金管局規定最高供款對收入比率唔可以高過六成，冇97年九成攞嚟供樓咁癲，但係未計二按。一按兩厘息，二按係廿厘息。本來97年到而家層樓已經供斷，但係而家再按過，幫仔女畀首期。

樓市瘋狂過97年，負擔唔細得過97年，環境就差過97年。1998、99年環境好差，2000年好啲，之後3年好死，2003年開始又翻生。97年係就係一個浪打埋嚟打沉好多人，但係捱咗6年終於都見岸，原因的確係阿爺放人放錢幫拖。

再冧市　阿爺無嘢救你

今時今日，再嚟一個浪打埋嚟，阿爺再冇嘢可以喺個袋度攞出嚟益你。香港人嚟講，97年撈唔掂，可以返大陸碰吓運氣，隨時殺出條血路、翻身。今日，你連返大陸搵餐晏仔都冇機會。唔止，而家內地人仲落嚟香港做埋你份工。好似97年嘅大冧市之後，公司要裁員，好大機會先裁上年紀嘅香港人，佢哋正正係供緊樓嘅大軍。

人民幣貶值，A股崩盤，中國經濟放緩。香港經濟唔好得去邊，職位被內地人蠶食，要跟美元升值加息，仲要供一層貴到上天嘅樓。即將來臨嘅股災，房地產冧市，香港人嘅抵抗力其實差過97年。莫講話阿爺冇藥去救你，有都畀香港內地人攞晒。人民幣貶值令香港企喺貨幣戰爭入面人民幣嘅對家，香港人，要諗吓自己如何在戰爭中生存。