2015年9月4日星期五

打橫行嘅男人 - 方卓如

2015年9月4日 - 信報

十優港姐嫌男友唔夠成熟?識貨,男人係要脫離晒男仔嗰浸除,先至係打橫行嘅時候。

成熟有好多客觀指標,但同年紀冇直接關係。雖然成熟嘅男人通常起碼都有三四十歲,但五六十歲依然係細路仔一名嘅經常有(正確嚟講,三十歲以上嘅細路仔行為,我哋實情係稱之為白癡仔一名),所以唔一定老咗就等如成熟咗。

咁有啲乜嘢指標?錢唔係其中一樣,有錢唔一定成熟,成熟唔一定發達,但成熟嘅人一定搵到樣自己喜歡嘅工作而又搵到食養到屋企。餐搵餐食,過得一日得一日,唔叫成熟。就算畀你搵到份高職,但每日營營役役,返工等收工再等退休,只係揸頸就命,世故做人。表面睇都似係成熟,因為開口埋口講現實,唔講理想,骨子裏只係行屍走肉,只係唔會遺害社會嘅白癡仔。成熟嘅人最終會搵到一個門口,將自己嘅理想變為事業,外人眼中更無經濟價值嘅事情,都可以畀佢搞成可以養妻活兒。

年紀大不等於成熟

成熟嘅男人情緒非常穩定,佢後生嘅時候可能大情大性,敢愛敢恨。但人大咗,見過世面,遇過挫折,佢知道好多嘢整定,唔係你叻,唔到你惡,命裏有時終須有。有嘅時候唔會狂喜,失去嘅時候唔會大叫。佢有時會發脾氣,但主要係發自己脾氣,嫌自己蠢,嫌自己白癡,唔會諉過於人。

沒有無緣無故的愛,沒有人一定要對你好;對你差嘅人,係你命中注定,係要硬食。睇通人情,你唔會被任何人影響你情緒,朋友同敵人,混為一體,無分你我。

知道自己要乜,知自己有乜冇乜,就係終極嘅成熟表現。人就係一場尋覓過程,喺你死之前搵番自己。搵到嘅,你就不枉此生。搵唔到嘅,一生就白過。鬥快搵到自己,就係成熟與否嘅比較。十優港姐,晨咁早就搵到自己,喺佢眼中,自然成熟嘅人唔多。男朋友,唔係你嘅問題,更加唔係你年紀背景嘅問題。遇着個快熟成咁嘅,你邊有得鬥。找到自己,情緒穩定,搵到兩餐,養妻活兒,成熟嘅男人一定活得開心,唔會終日愁眉苦臉為層樓。咁嘅男人,重唔打橫行?

沒有留言:

發佈留言