2015年4月22日星期三

切割先有真嘢睇 - 方卓如

2015年4月3日 - 信報

今日應該冇人睇報紙,因為相信會睇呢份報紙嘅人,都已經飛晒去旅行,所以我寫乜都得。

究竟報紙可唔可以學電子傳媒一樣,話作者所講嘅嘢唔代表報紙立場?呢條問題嘅答案,應該會隨着唔同時代同地方而改變。以前媒體有限,手握頻譜地盤分配權嘅老闆,惡晒,佢搵邊個講、邊個寫,真係話晒事。以前爭取到一個地盤發表意見,寫又好講又好,真係難過登天。有咁嘅機會,你唔會亂嚟,一定按指引出發。

博落化鑽出一絲裂縫

你偏離路線,寫嘅嘢唔啱睇,換走你,解釋都唔使。而且以前媒體唔多,踢咗你走,你幾唔憤氣都好,有冤無路訴,鬼睬你。以前嘅報紙,人為操控又好,環境因素都好,作者差唔多係報紙嘅外判員工,好難乾脆切割。

而家唔同晒世界,報紙自己都驚冇人睇,冇得惡。搵人寫稿,錢又唔多,又幫唔到作者成名,唔好話有知名度嘅健筆,普通一個作者,你稍為同佢表達內容方向意願,已經係死罪。佢喺自己facebook講兩句,就可以提升為言論自由嘅層次,自我審查嘅級數。編輯莫講話改動內容,就算想改動用字,分分鐘會俾原作者喊打喊殺。報紙編輯只敢執錯字,邊夠膽改內容。

最弊嘅係,你唔想成為兩邊極端嘅報紙,就真係要變成博落化。而家咁嘅時勢,你唔係政府喉舌,就係反對陣營。想企喺一個中間開放啲嘅位置,代價就係得罪晒兩邊嘅人,兩邊都會認你係敵人。咁嘅氣氛環境,一係你同作者切割,你有你寫,唔關我事。又或者我攬你,但我要改你。你畀我揀,喺真話買少見少嘅時勢,我寧願報紙博落化,等我哋仲有一絲裂縫,可以透到啖自由嘅空氣,睇到一啲夠膽寫嘅嘢。唔代表報紙立場,呢個擋箭牌唔係益咗報紙,係益咗讀者,等你仲可以睇到真嘢。

沒有留言:

發佈留言