瞇埋眼買啦 - 方卓如

2015年4月14日 - 信報

我都估唔到自己咁大影響力，上星期講完無綫應該重播《大時代》，下星期就即刻有得睇。咁即係話，同你而家日頭要做嘅嘢一樣，「追」啦大佬。

而家呢個時候，最愁係邊個？唔係冇貨嘅，亦唔會係有貨嘅，最愁梗係沽貨早咗嗰批啦。你諗吓，港交所（00388）靜咗咁耐，突然間升到二百幾蚊，正常人都覺得開心晒，沽咗收錢，點估到第二日一升就四十幾蚊，變咗三嚿水？

升市仲驚過跌市

人哋話股市有貪婪同恐懼兩大情緒，但唔好誤會升市時只有貪婪，跌市先有恐懼，升市時候嘅恐懼感仲厲害。你會驚沽好唔沽好？沽咗再升點算？唔沽跌落去又點？升市時候嘅情緒管理仲難過跌市，大部分人敢輸唔敢贏。而家咁升法，你身邊發咗癲嘅人應該唔少。

而家啲人會問買乜嘢，其實答案好簡單，瞇埋眼就買你最認識嗰幾隻，反正隻隻都有機會升，除非你最近當黑，買邊隻跌邊隻，唔係嘅話，拉勻一定贏。你睇吓十大升幅榜，升兩成都冇資格入十大。十大跌幅榜？跌幾個巴仙已經喺十大。咁嘅市況，仲唔係迫你發達？仲要問買乜？

今年好多人會有錢咗，但唔一定係開心咗。我見唔少有錢人，一啲都唔開心，正如我之前所講，物質生活提升嘅過程，係令人類感覺愉快最便宜嘅方法。萬一去到某個位，物質已經豐富到令人無感覺，咁你就頭痕喇，因為可以再令你開心嘅嘢，可能你一世都搵唔到，你只能夠唔開心地過下半世。唔好羨慕人哋暴發，你營營役役但愈搵愈多，生活keep住不斷改善，先至係最幸福。