股市得四類人 - 方卓如

2015年4月13日 - 信報

狂牛時代，唔好問買唔買，只問買乜嘢。呢條問題仲難答，因為隻隻都有得升，變咗你講啱咗會升冇人欣賞，反而升得比人少叫人賺得唔夠多仲會畀人鬧。

經濟唔好股市未必唔好，但股市好經濟唔會差得去邊。你睇吓上星期五，歌舞昇平爆到冚，落雨都唔怕。

股市升咗上去，唔一定即時爆落嚟，可以喺天上打橫行好耐，你睇美股，萬八點之後，仲未一下子向下插，萬八萬七上上落落。港股用兩日時間上了個山腰，用兩日時間令大家醒晒，重啟塵封咗好耐嘅股票戶口，唔會咁快就爆破玩完，咁穩陣嘅升市，一世人冇幾次。

而家話港股A股化，係好定唔好？股票市場得四類參與者：散戶、基金、大股東同莊家。你參與股票買賣，自己對號入座，一定係是但一款。喺香港，散戶唔一定係輸錢嗰個，好多時有散戶係贏大錢嗰個。為數唔多，但唔可以睇小。雖然佢哋喺市場上最大嘅優勢只係可以走得甩，但走得甩同走得快，往往就係致勝之道。基金贏在錢多，坐得近公司，可以開啲好啲嘅買貨條件。但弊在航空母艦轉身慢，又有客戶贖回壓力，要贏都唔係咁易，輸錢嘅基金大有基金在，倒閉嘅不計其數。

大股東一手股票，全世界望住，股市大升，可以唔關佢事。股王價錢直線上升，連對沖基金都挾爆，但唔見大股東可以套現骨水。佢唔想眼白白睇住升市唔關自己事，要諗好多計仔先得。

做莊嘅，升市唔代表一定賺，因為佢哋嘅行業特點係要賺錢之前，先要投入更多嘅錢。到佢哋投入足夠多嘅錢之時，隨時可能完場，一手都係貨。做莊做到輸錢嘅，好常見。

A股化後，前三類人都冇大分別，最後一類就翻天覆地。更多嘅A股莊登陸香港，更多嘅股王出現。香港冇升停板，一日升一倍嘅股票，將來變成新常態。各位市民，你撳定錢，準備好未？