狂牛冇咁快收隊 - 方卓如

2015年4月9日 - 信報

留意吓昨天各大報章知名的財經專欄，幾乎好似互抄一樣，一面倒話港股狂牛出籠。事實上，佢哋全部啱晒，2500億成交，升1000點，仲唔係大時代來臨？

累積三日嘅升幅，一日升番晒，而且係愈晏愈升，表示買貨嘅人唔單只唔覺得貴，直情覺得抵！2500億錢嘅貨係現價買，唔會係升多兩三日就走去沽，代表未有耐升完。

調動內地彈藥　未買齊貨

最有象徵意義嘅，唔係2500億成交，唔係1000點升幅，而係用盡咗嗰100億人仔嘅南下配額。你諗吓，有本事買港股嘅單位，晨早布晒陣喺香港買股票，所以「港股通」不嬲都用唔到幾多每日配額，都幾慘淡。但係昨天一係唔用，一用就晏晝開市冇幾耐就爆額，代表以前冇買開嘅單位而家開始買，仲有係一向有布陣喺香港嘅，用盡子彈，調動唔切，要動用內地彈藥。咁即係話，內地資金未買齊貨，仲要繼續再買。

咁你話，今次狂牛出籠，會唔會咁就玩完收隊？仲有，連北上買A股嘅配額都係沽多過買，就證明唔使多講，今次內地擺明車馬，要買起全香港。

世上沒有無緣無故的愛。開晒水喉要浸滿全香港，唔會係要益你香港人，一定係有一個諗得好通透嘅原因。

順勢而行　賺錢為上

至於呢個原因係乜？關你事咩？你要嘅係結果。經我多年嚟近距離觀察而得到嘅教訓，唔好睇到一啲表面發生嘅事實去估計背後原因，你永遠估唔中，仲隨時因為你亂估，而做出錯誤決定。

你只要根據見到嘅表面現實，順住去做令你賺錢嘅事情就得。你見到嘅現實係，有好多錢排住隊瘋狂咁買，咁你仲等乜嘢？