2015年4月22日星期三

真正嘅金融才俊 - 方卓如

2015年4月16日 - 信報

社會荼毒你太深,你成日以為金融才俊一定係西裝骨骨,臘令個頭,滿口英文,出入香港會同Sevva,俊男美女。我都算見唔少金融才俊,等我話過你知真正嘅金融才俊係乜嘢款。

我最近先發覺本欄在行內收視率頗高,直情係文字版嘅「大時代」。放心,我以下寫嘅唔會得罪我身邊認識嘅人,皆因佢哋全部都係真材實料如假包換。

你成日俾人荼毒嘅畫面,係嗰啲喺鬼佬大行做銀行家嘅西裝友,佢哋就係最典型被描述為金融才俊。但係佢哋打份工,人哋叫做乜就做乜,唔係點使用腦,成日就係對住份PowerPoint左改右改,裁員第一批就係佢哋,成日都要搵head hunter嘅,又有幾才俊?佢哋除咗張卡片,乜都冇。佢哋見到新相識嘅時候,會話「我係x行嘅Peter仔」,彷彿佢個名係七個字,想用佢間行嚟嚇你。

你問多佢幾句,其實佢乜都唔識,因為佢一向做嘅嘢,同做秘書和做功課冇分別。

堅嗰啲又點?都會着西裝,但係呔就唔會點打,一條呔係用嚟分別靠人定係益人。至於邊樣係邊樣,自己諗。金融才俊有錢有橋有人脈有本事,唔使靠你醒佢,佢抬錢抬橋搵你一齊合作搵街外錢。佢哋唔做點派卡片,你老早已經喺街上聽過佢的名字。

自己就係招牌

你見到佢,最想同佢交換嘅,唔係卡片,係微信。有佢微信,你會搵到佢,見到佢朋友圈,實際過押佢公司電話同電郵。金融才俊唔使用間投行嚟做招牌,佢自己就係招牌,見到面隨時連名都唔想你知,因為佢無意思去 你生意。

呢種人,中環大把,但你睇佢唔出。佢哋衣着唔光鮮,最貴係手上隻PP或AP,出入中環幾間雪茄吧,用手上部電話微信來WhatsApp去。佢哋唔怕裁員,因為佢哋自己就係印銀紙機,邊有人炒到佢?

沒有留言:

發佈留言