有血性嘅買少見少 - 方卓如

2015年4月1日 - 信報

沽空要賺一倍，股價要跌到零，但實情邊個沽空要出本，全部都係槓桿進行，借到盡。所以對沖基金要做低你，佢唔使擺低好多本錢，畀得起利息就得。但係咁做，有一個死穴，就係貨唔到你無限借，反而你對手用嚟買貨嘅錢可以係無限。你用有限嘅貨，想掟散人哋無限嘅錢，先天上已經輸咗一半。同當年索羅斯沽空英鎊唔同，佢係用錢鬥錢，基本上大家都無限子彈，睇吓邊個命長。

股票唔同，貨源是有限度，你看準佢價錢太高唔合埋，沽散佢，借貨借盡，彈藥唔夠，你只可以乾巴巴看着自己被挾死，相當慘烈。你原本以為2000億市值嘅公司，冇人會有幾百億錢攞出嚟同你對撼。偏偏就係可以有一個銀紙的無底深潭，吸乾晒你沽嘅貨。呢次係中國隊狠狠的教訓鬼佬隊，未計差價，蝕息都可以令人收檔。

Pirelli被CNCC睇中惹擔憂

對沖基金嚟香港搵食，中國公司就走去歐洲買嘢，牌面睇中國王道好多，真金白銀買你嘢，仲要跟手煩點樣營運落去。歐洲牌子某程度上都有啲信心保證，但國產化後，仲係唔係同一回事，真係要時間驗證。

Pirelli最近俾CNCC（中國化工）睇中，有兩樣嘢令好多好豪邁嘅男子擔心。第一就係條軚仲得唔得，Pirelli不嬲係頂級意大利車廠用軚，唔止係跑車，Ducati那部有如蝙蝠車的Diavel，尾轆是嚇死人的240軚，只有Pirelli獨家供應。國產化之後，Pirelli仲啱唔啱頂級跑車用？

第二樣嘢仲叫人擔心，Pirelli每年都有出月曆，係一眾男子引頸以待的藝術之選。國產化後，全部月曆變成李冰冰范冰冰，對藝術界可謂災難性後果，冇人願意見到嘅慘劇。歐羅咁平，中國大手購入歐洲貨陸續有嚟，對地球人嘅生活影響，未來幾年會漸漸浮現。

市建局行政總監請辭，據講理念有別，唔想做另一個發展商，或地產商嘅收樓部。今時今日，有血性嘅政府打工仔真係買少見少，如果理念唔同寧願劈炮唔撈明志嘅，更加係難能可貴。多啲政府打工仔肯堅持乜嘢係啱、乜嘢係唔啱，唔係單單接柯打辦事，咁香港人就唔會變成有理想冇希望。