董事都要聽老細話 - 方卓如

2015年4月22日 - 信報

而家美國有股東維權運動，要proxy access，即係股東要有權提名董事，唔係齋做橡皮圖章，由董事局入面嘅提名委員會畀幾個你揀。美國佬先至係語言偽術嘅一代宗師。印銀紙叫quantitative easing，支持墮胎就叫pro choice，股東要提名董事就叫proxy access，即係股東收到嗰張叫你選董事嘅proxy form，股東要有權話上面擺邊啲名，咁就係access。美國佬最叻巧立明目，用嚟大人，呢啲手段，要學。

董事有責無權

Proxy access 係香港行唔通，如果公司股權分散，你夠貨已經可以叫董事會畀位你，領匯（00823）以前試過。如果股東唔分散，一個大股東，你有幾多貨佢都唔會睬你，反而會批股供股再批股溝淡你，所以proxy access呢類口水嘢，唔啱香港。

再退一步，上市公司最大權嗰個，喺香港嚟講，都唔係董事。香港有三類上市公司，國企央企呢類上市公司，董事其實係官，你覺得係佢話事定係佢老細話事？另一類係有個大股東嘅公司，大股東隨時連董事都冇做，但係佢就係成間公司最醒嗰個。你覺得係董事聽佢話定佢聽董事話？最後一類，就係好似滙控（00005）呢類股東分散嘅公司，董事都唔知自己做得有幾長，冇一個真正說了算嘅老細，一切憑業績。只有呢啲公司，董事真係有實權。咁你又覺得香港有幾多滙控呢類公司？

香港人咁識炒股票，我講咁長篇大論，都唔係乜嘢驚天大秘密，邊個唔知上市公司董事有責無權？同樣道理，香港呢間國際金融公司，佢啲董事又有幾多個人意志？都係要聽老細話。弊在香港呢間金融公司，大股東同小股東嘅利益好唔一致，價值觀各走極端，小股東又唔可以沽貨走人，被迫長揸陪坐。要搞個proxy access，有權提名董事，都係想保住條命仔，全家揸重貨坐到尾，唔使輸到渣都冇。