2015年3月17日星期二

直情係窮人恩物 - 方卓如

2015年3月12日 - 信報

人哋美國係白人歧視黑人,喺呢度就畀人話係中國人歧視中國人,即係香港人歧視大陸人。

但係呢種情況係雙向,都有唔少大陸人睇唔起香港人。發生喺我身邊嘅實例,香港畀人感覺你好唔掂,要北上搵錢搵機會,覺得你香港人冇咗大陸唔掂,呢種心態唔只係購物客,連大陸啲中間人生意人都係咁諗。既然話大家係兄弟,兄弟好少成日話邊個冇咗邊個唔掂咁冇品。我哋要清楚自己有乜本錢喺手,千祈唔好畀人洗腦,覺得你自己要乞食一樣。

蘋果金表突顯特殊身份

蘋果金表一定賣得,除咗一向唔戴表嘅女士會當買袋一樣整番隻傍身(唔一定自己買,亦好大機會唔使自己買),麻甩佬都會整番隻。點解?你知唔知男人成身有啲乜嘢可以炫耀,可以晒冷?咪係隻表囉。

但係而家炫耀消費量化寬鬆,幾皮嘢一隻勞,通街都戴緊,真係要炫耀,要話畀人知你撈得掂,隻表冇番二三十個,唔見得人。得幾皮嘢budget,蘋果金表就畀到你特殊身份。本來三千蚊有找買到嘅表,你肯用十皮去買隻功能一樣嘅,仲唔係撈得掂,兼有品味?呢隻十皮嘢有找嘅表,絕對可以同人哋陀飛輪金表並駕齊驅。蘋果金表簡直係窮人恩物,一定賣得。

仲有,要炫耀,你有隻表唔夠,仲要有得換。日日戴同一隻,等於你日日都着同一套西裝,好景極有限。要有幾隻幾十皮嘅表,真係講實力。

蘋果金表日日戴,冇人會話你,唔通你會日日換電話咩。呢啲咁subtle嘅人類心理學,再加市場打滾嘅實戰血淚史,邊係一啲淨係識諗大陸人要唔要貨、炒唔炒得起嘅先達人可以理解?要認識呢個世界令自己有實力,最好戒除凡事第一句就問:「大陸人點諗?」

沒有留言:

發佈留言