睇唔到先係戲肉 - 方卓如

2015年3月23日 - 信報

愈嚟愈多財技嘅書同專欄，基本上就好似智能手機一樣，普及到連的士司機都識得講番兩嘴。但係同智能手機一樣，你知道佢嘅存在、明白佢嘅運作、了解佢點賺錢，但係你都冇辦法照做，就如你冇本事整一部智能手機出嚟一樣。

點解？最難係execution，而你係唔會有本事做到呢樣嘢。唔好以為execution係錢，錢反而係小問題，一億幾千萬好多人都有，但係識做嘅人，同一個做到熟嘅老手，大家嘅一億幾千萬係完全唔同。好簡單，而家話幾億可以買殼，你有幾億，你寧願買樓定買殼？你睇見人哋幾億買殼可以再炒到幾十億，畀你照做，你做唔做到？你睇咁多書咁多專欄，有冇邊個教到你點做？冇，因為寫畀你睇嗰個，佢都未做過。

唔照做，睇嚟趨吉避凶又點？都冇用，因為你永遠睇唔穿全局。書同埋專攔話到你知全世界都睇到嘅事情，但睇唔到或唔使講嘅嘢，先至係戲肉。呢啲戲肉，只有做嗰個先知，外人永遠唔會知道。好似你用緊WeChat，但究竟後面發生緊乜嘢事，邊個同你一齊睇你啲訊息，你永遠唔知。不過，睇吓無妨，有趣味嘅事情愈來愈少，總好過你睇無聊電視劇。