2015年3月24日星期二

主同客掉轉咗 - 方卓如

2015年3月18日 - 信報

十四歲女童畫牆,警察要出人身保護令。公主報警,警察都可以俾人趕走?公主其實唔使出嚟拍戲,佢已經係全香港最有創意最爆嘅新晉編導,好多香港人都睇緊佢台戲。

喺香港,你喺兩個地區最能夠感受到香港係中國嘅地方,一個係水貨區,一個係金融區,兩個區都唔係香港人主導。水貨區我少去,或者話係我唔敢去,我怕有人帶隊出嚟熱烈歡迎我,又或者連路過都會俾人拉咗。

但係金融區我成日去,喺某啲角落,你真係會以為自己喺北京,你會覺得自己係香港人,講廣東話,係少數民族,係異類呀。唔好以為係你走咗入人哋社區,好似你星期日走去遮打道,梗係覺得自己去咗菲律賓啦。錯,喺金融區,令你覺得自己係少數民族嘅原因,係你平日去開,一啲非常local嘅地方,食又好,玩又好,你會發覺,係講國語㗎。佢哋訂位、叫餸、埋單,熟過你,地道過你。你未感受到?慢慢,多啲走出街,你會知道邊個係主,邊個係客。

昨日講可以用報告對付報告,關鍵係你要勁過對手先得。成間公司嘅賬目,得兩個數係真正客觀存在,現金同股本。其他全部都係計算出來。點計先啱,只要你夠勁,你說了算。點解成日都可以有啲無名無姓嘅,可以走出嚟講幾句,話你計錯,咁就推冧股價?因為壞話殺傷力不嬲都厲害,而且亂講話你計錯都會有人信。而且,無名無姓嘅,通常都俾人專家嘅感覺,你睇幾多意見領袖個名係假嘅,人都未見過就知。要反駁,話人錯,你啱,你就要大聲過佢,講得深過佢,唔係咁易。但重點是,冇乜人明白其實啲數係計出嚟,本來就冇。你認真去話啲數梗係存在,咪唔令人信服囉。

沒有留言:

發佈留言