2015年1月7日星期三

掛牌好過有牌 - 方卓如

2015年1月7日 - 信報

成日都會有人問,你公司賺錢好哋哋,做乜鬼要上市?以前嘅答案可以千變萬化,乜嘢花款都有,將來嘅答案就多咗一個:你睇吓亞視就知。

亞視同港視(01137),一個有牌一個冇牌,一個上市一個冇上市,兩個財政都唔多掂(一個大家有眼睇,另一個tree gun話佢唔掂),但命水兩個就好唔同。冇牌的上市公司,靈活走位,要裁員都可以賠到足。冇上市的有牌公司,裁員都冇力,員工鍾意自己走就走。做生意嘅,你寧願有牌定係掛牌,只要你唔係笨蛋,唔需要教你點揀。

如果亞視係上市公司,接管人就唔使咁頭痕,大把計仔喺手。大股東被勒令減持,大折讓在市場出售即可。股東過往以貸款注資,搞唔掂呢批欠債好難再搵白武士,發行零息不可轉換優先股,以股代債,迫股東唔注資就攬住公司一條船,等接管人可以搵下手繼續歷史任務。只要股票有價,接管人就有辦法令股票有市,員工就唔使半份半份糧逐啲出。

港視掛牌生猛得多

港視就唔同,冇牌但有掛牌,生猛好多。市值接近資產淨值,對於一間蝕錢的公司嚟講,直情係投佢信心嘅一票。港視現金都唔算多,唔蝕得好耐。但勝在佢有股票,又冇牌照限制,供股批股借錢乜都得。有計嘅,冇牌畀佢播;有牌嘅,冇計可以續播,呢個城市你話幾咁詭異。

媒體一浪接一浪推陳出新,估唔到第一個要死嘅,竟然未係報紙未係電台,反而係免費電視。你睇另外兩間發咗牌嘅收費電視台,到而家都唔肯郁,揸住個牌唔開台,就知市況係一開就蝕,遲開遲蝕,唔開唔蝕。香港可能真係養唔到咁多個免費電視台,亦沒有太多人才讓你經營一家賺錢的免費電視台。有互聯網之後,資訊同娛樂已經唔使再靠坐定定嘅免費電視,反而可以陪你走來走去的報紙電台仍然可以生存。完成歷史任務嘅,其實可能唔只係亞視。

沒有留言:

發佈留言