只有一個蔡東豪 - 方卓如

2015年1月5日 - 信報

我們都是原復生，你也可孔少林，但只有一個蔡東豪。又畀你贏一次，做傳媒最怕咩？最怕無聲無息，出咗街都冇人知。你睇大班？直頭隱咗形，以前個十點前特首，而家隨時連名都噏唔出，莫講話影響力。

你已經聰明絕頂，鋪晒條路，等傳媒知你開咗間新公司，又搵總編寫電郵同啲舊人講啲唔講啲，製造懸疑。亮相嗰朝仲要預告下晝有公布，慌死人哋條癮斷咗唔騷你。雕龍雕鳯寫一篇出世紙，搵嚟成班明星級代父代母，就算他朝你俾人的咗去秦城，都迫唔到你再一次練死個場。

最知道自己要什麼

睇得出乜嘢？睇得出你唔服氣，唔肯就咁就恐懼一世，去澳洲養老。知你一直情歸傳媒，但估唔到你去得咁盡。你諗盡辦法要個場橫空出世時要留得住未散晒嗰啖氣，我諗你斷估唔到竟然會成為城中話題，口誅筆伐的眾矢之的。你做事一向要型，今鋪真係唔衰得，幾萬對眼（目及）到實。仲好，不論仇家定支持者，個個都睇住你點搞，你仲唔係呃like之王？

做傳媒最重要係乜？就係發掘培養啲勁人、明日之星。紙媒如是，其他媒體亦然。邵逸夫鄒文懷，唔係搞咗個電視台電影公司咁簡單，李小龍都可以捧咗個出嚟。查良鏞林行止，唔單止自己識寫嘢，重識搵啲有本事嘅人一齊寫，自己點寫得晒。至於黎胖子……都有肥龍同骨精強，名動一時。

無可否認，蔡東豪係有呢個本事。之前寫開嘢嘅人，不甚了了，黐埋佢度，會突然間師兄弟番晒嚟，帶着滿身神彩。就算本身未曾寫作，一經佢點化，唔止寫得，出書都仲得。近期你數得出，寫啲嘢有紋有路好睇嘅，有邊個唔係佢帶出嚟？其他想模仿佢搞新媒體嘅，有邊個寫手你講得出名字？

佢係我見過咁多人當中，最知道自己要乜嘢嘅人，只此一家。人最脆弱是什麼時候？就是一無所有嘅時候，屆時有什麼送到埋口，你都在無得選擇之下，寧願袋住先。佢唔係，喺佢兩手fing fing嘅時候，送到埋嚟嘅嘢，唔啱嘅，佢彈鐘。今日佢大把選擇，佢揀人唔係人揀佢，佢揀呢條路，一定係佢想要，仲係想要到暈嗰種。佢未必諗到街上原來有咁多牙齒印，但係呢鋪一經出山，就冇得返轉頭，佢一定知。呢個世界鵪鶉嘅人多的是，有一個知道乜嘢叫恐懼都肯搞傳媒嘅人，喺今日嘅香港，多一個得一個。

廠佬做傳媒有優勢，兩樣嘢喺香港都冇得搵大錢發大達，都要靠每日一滴一滴做好啲，輸少當贏。究竟會贏粒糖定最後輸間廠，睇過就知。