進入炒鑊勁嘅時代 - 方卓如

2014年12月8日 - 信報

報紙雜誌話而家啲國際油價推到落去60蚊咁滯，遲早拖冧俄羅斯經濟。文弱書生即係文弱書生，諗嘢都係迂腐過人。一個人窮得滯會點？梗係夠薑揸槍走去搶。俄羅斯唔還債有前科，再迫到埋身，開拖打仗都仲得。弱國先至會無還擊之力，強國要反擊，可以攬住你同歸於盡。

迫出怪獸　一大勝利

日圓割喉式貶值，梗係唔會為咗畀你買平嘢。呢個世界慣咗係爆煲、復蘇、狂炒、再爆煲，唔會話係直線慢慢上升。而家進入咗炒鑊勁嘅時代，梗係要炒埋一份，但係要有戰戰兢兢的心態，有乜事即走。

嗰個人叫啲後生仔要眼光放遠啲，唔好死守香港，出去搵番自己嘅世界，其實佢講得非常之正確。從前嘅香港已經失守咗，唔關而家啲年輕人事，係而家話事嗰班送咗從前嘅香港畀人，換取自己想要嘅嘢。年輕人對呢處地方有感情，唔捨得失去自小認識嘅地方，情懆高尚。但畢竟人類青春有限，到你搞咗幾十年先發覺原來得個搞字，你已經冇咗幾十年。曼德拉坐咗27年監修成正果，但其實都要客觀環境有個克拉克總統肯放你監先有得搞。上次啱啱講完車仔寧願有贏有輸都唔想場場不敗摸和，轉頭車仔就真係輸咗。年輕人已經迫呢個社會深藏嘅怪獸出晒嚟，俾人見到晒。淨係咁，已經係一大勝利。往後要好好找尋自己理想嘅生活，冇咗個主場，就場場去作客贏七比零。

嗰頭話香港要留番住自己嘅professionalism，呢頭有人話我知香港啲professionalism已經所剩無幾。咁又係，呢樣嘢，要一滴滴儲番嚟，但係要扭開個蓋倒走晒，兩三下手勢就玩完。好多時候，唔一定係人哋摧殘你，自我毀滅有陣時仲慘烈。