十年一仆驚唔驚 - 方卓如

2014年12月3日 - 信報

每年年尾都有大事回顧，對於香港，幾年後睇番轉頭，呢一年肯定係整個城市加快衰落嘅一年，無論經濟同政治都係。

佔中三子自首，勸人退場，將運動帶入社區。其實運動一早已經喺社區，將運動帶入選區先最實際，將憤怒變成選票，咁先叫做有實質效果，齋係喚醒有鬼用。可惜，正如我之前所講，香港冇人，你想投票都唔知投畀邊個好。

不屑入建制　香港冇人

下年開始係選舉年，連續三年有選舉，有心人而家着手組織，儲夠人出擊，咁先可以將運動變成實力。2003年七一遊行之後，加上封咪事件，咁就造就咗一批從未從政的人選舉勝出。今次佔領運動製造了咁多社運明星出嚟，選舉嘅勝算仲勁過2004年。唯一唔同嘅係，2004年嘅中產參政，係斯文人，相信走入建制去改變社會。但十年後嘅佔領人士，根本就唔相信建制，入去都係打鑊勁，日日俾人趕走。如果係打，出面打比入面打仲有用，佢哋有自己嘅判斷。所以，後佔領時代點樣將度氣勢帶入社區，愈搞愈虛，就係因為最實際嘅嘢佢哋不屑做。咁鬼形而上，提出訴求又係咁，後續方向又係咁，香港真係冇人。

經濟唔使多講，2015唔多掂。我老友崩哥喺券商做坐館，手下幾百人跟佢搵食。佢話，87、97、07、17，每十年一仆，呢個循環唔到你唔信。距離2017咁近，呢一個劫唔荒遠。而你睇吓四周圍環境，日本紙跌，俄羅斯紙跌，唯一美金唔跌，同之前十年一仆何其相似？都唔使識經濟學，只要你有睇報紙習慣，都應該聞到味，要有戒心。消極嘅，就驚資產價格大跌；積極嘅，儲錢執平嘢。但香港受咗呢一棍，未必有人救到你咯。