後佔領，後滬港通時代 - 方卓如

2014年11月19日 - 信報

「滬港通」反高潮，唔高興嘅唔應該係香港，呢個戰略層次嘅政策，應該係有戰略高度嘅人先會高興定唔高興。北上嘅水喉，應該吸收到借唔到QFII額度嘅投資人。既然北上嘅「滬港通」額度第二日已經用唔晒，證明投資A股的需求並無預期咁大，呢樣先至值得有戰略高度嘅人關注。

「滬港通」開通在佔領時期，兩者加埋正好叫香港人思考應該如何在「後佔領」同「後滬港通」時代自處。

這兩件大事絕對可以叫地道香港人醒醒，未來世界嘅生活可以幾坎坷。可能我企喺蠶食指數最高嘅危險地帶最前線，我嘅危機意識非常之高，對於幾年後乜嘢環境，仲有冇嘢撈，日日都要諗，諗少日都唔得。

金融行業　港人無得撈

嗰個人話「滬港通」唔應該計成交額多少，有「滬港通」就有大量工作機會畀而家讀緊金融商科嘅後生仔，以佢過去講過嘅咁多大話，呢句最害死人。基本上以後金融行業都唔到香港人做。「滬港通」，客人要買A股，你估佢想搵個香港人定內地人服侍佢？噢，對不起，其實服侍佢嘅內地人都係香港人，都有香港身份證，只不過唔係地道香港人啫。嚴格嚟講，嗰個人都係冇講大話，的確有好多工作機會畀香港後生仔，但係呢啲後生仔從來都唔識講廣東話。

我不嬲都話，香港唔會死，只係香港人會好難捱，你以前有嘅防線保護罩，唔單止冇晒，仲會有好多不平等嘅政策，搞到你冇得同人爭。裙帶關係梗係令你冇啖好食，但係你喺香港大呢個客觀現實，已經令你冇得同人鬥，除非你極速變身，同化自己成為內地人。

不過，人哋認你唔認你，又係另一回事。