2014年11月24日星期一

印完銀紙放喺床下底 - 方卓如

2014年11月24日 - 信報

二十世紀要練功投資,須學曉分析什麼基本價值投資法,睇投資目標是否扎實,有冇盈利貢獻。二十一世紀,呢啲嘢全部可以掉落垃圾桶,最緊要識得乜嘢係貨幣政策,啲錢點走,會走去邊。

二十一世紀,錢去邊度,邊度就升;由邊度走,邊度就跌。二十一世紀你唔搞清其實錢是什麼概念,唔好學人去投資,輸鬼死你。唔信你望吓四周,全世界印銀紙,乜嘢升乜嘢跌,都係因為睇吓邊個印得狠啲。「滬港通」死咗火,啲錢原來唔走落嚟,全部打回原形。人行減息,大家又再升番晒。就算係細價股,你話佢哋自己賺多咗錢升得多,還是轉手賣畀人升得多?呢個世界唔再講自身實力,錢就係實力,啲錢冧落邊度,邊度就掂過碌䉀。

三路人馬穩賺不賠

咁你點先可以賺錢?最威水梗係做揸錢嗰個,大則負責印銀紙,中則手握大量銀紙可以全世界調來調去,小則有足夠彈藥可以開個盤揸莊,都可以叫你穩賺不賠。你三瓣都唔係?坐近啲呢三路嘅人馬,你知道啲錢會點走,都夠你印印腳過埋下半世。咩話?你唔識呢啲人?咁你閉關苦練,點樣可以睇到呢啲調錢嘅手影,畀你十鋪贏七鋪,都可以夠你搵到餐晏仔。

中國印銀紙其實不讓美日歐專美?其實印銀紙唔可以睇印幾多,印完之後放喺床下底唔用,呢啲都係死錢,對經濟冇影響。

你睇,中國印咁多銀紙,原來一噸一噸擺喺屋企,數到連數銀紙機都燒埋,你話對經濟邊有幫助,所以中國印極都唔夠,要出動減息就係咁解。全世界鬥印銀紙之後,會變成乜嘢世界,怕且冇人有答案。

沒有留言:

發佈留言