2014年11月3日星期一

招魂認住討債 - 方卓如

2014年11月3日 - 信報

北京而家個天,藍到不得了,全靠刮咗浸大風,吹散晒啲霧霾。下星期APEC開會,北京要趕人走,最好唔好留喺度。你睇,長官意志,要做一樣嘢,就要做到盡,做成為止。香港看似長官冇叫做嘢,其實剛剛相反,就係吩咐你唔好做嘢。

樸實無華始正路

香港人喺北京,逢人就問你而家佔中點。作為香港人,你老實說真話就最好,唔理你支持好反對好。嗰啲偽造嘅圖呀,冒名寫嘅文章呀,如果你仲係為香港,唔該你用吓腦,唔好轉載share。

無論支持定反對,只要你講真話唔造假,香港仲有救。你仲喺度白癡地散播謠言,唔該你收聲當幫忙。

而家香港冇人可以有自由意志做任何嘢把佔領運動善終。做官嘅絕對冇自由意志,就算而家嗰個人忽發善心,為免生靈塗炭,想辭職以謝天下都唔得。阿爺講到咁行撐你,如果你撲出嚟話自己想唔撈,下場必定仲慘過香港良心。況且原來佢有咁多痛腳俾阿爺揸住,五千萬咁多人唔知反而阿爺一早知,冇咗佢個職位嘅護身符,全世界有排同佢計數,你睇睇陳水扁?全香港得一份工而家最穩陣,就算日日唔返工都唔怕冇得撈,問你死唔死?

勸退冇用冇意思

佔領人士更加冇自由意志停止佔領。所謂帶隊嘅嗰幾個根本冇得走,最多只可以返去教吓書,定時定候要返金鐘報到,慘過保釋候查。

學生領袖更加冇得走,唔通你叫佢留喺屋企睇電視而家邊度邊度又掛咗新橫額?普通佔領人士,佢哋更加冇得走。唔好以為佔領人士是一個人或一群人的統稱,實情係佔領人士已經係鬼魂一樣,係一堆精神意念。

唔同人喺唔同時間喺佔領區出現,因為普選橫死而出現的民主冤魂,你唔超度佢係永遠驅唔散。每日都有新事情為佔領人士添柴添火,佔領融入了日常生活,佢哋都冇得退。

試吓喺北京呢個距離睇佔領運動,你港島塞車對北京冇影響;樓市股市繼續照升,對北京冇影響;而家對付佔領人士嘅,其實都係香港人,對北京堅持「一國兩制、港人治港」都冇影響。任你佔領一年半載,都唔見得可以改變北京嘅主意,反而仲更加堅定。

最後結束就係等清場,痛痛快快打一場。

其實,兩邊都下定咗呢個決心,唔見血唔會心息,再勸撤退已經冇意思,還是召喚更多冤魂,認住將來向邊個討債。

沒有留言:

發佈留言