以後場場作客 - 方卓如

2014年11月20日 - 信報

睇報紙話，佔領運動最觸動中央神經嘅，就係「命運自主」這四個字。

我唔明點解冇人出嚟講句說話，命運自主明明就係香港人最高尚嘅情操，係大多數人嘅終極目標。

成日講嘅財務自由，每個香港人想做到嘅境界，目的咪係要命運自主囉！你有財務自由，唔使睇老細面色，命運自主；你唔使憂柴憂米，可以過自己想過嘅生活，做自己喜歡嘅工作，命運自主；同自己最愛嘅人喺埋一齊，唔係因為要靠邊個邊個供養，命運自主。

See？香港人日搏夜搏，努力搵錢，唔搞政治，唔係想命運自主咩？而家竟然變咗係死罪，冇人夠膽出嚟講句說話，香港唔係淪落到咁呀嘛？

昨天寫到香港人瓜得，想同內地人爭都唔係咁容易，但係我咁講，唔係話香港人要受保護、要人餵。有啲工種你冇裙帶關係做唔到，但係內地人都唔係全部都有裙帶關係，冇人冇物，一樣都有好多人做到識飛。香港人有本事肯將自己同化，肯拋個身出嚟同你死過，點解唔可以突圍？

後「滬港通」年代，你就係要諗點樣同內地人競爭。香港人要承認已經冇咗自己嘅主場，但場波如果要繼續踢，你又未掛靴，作客都要落場打，唔係可以點？

為搵食何妨四海為家

其實，世界上有好多地方嘅人都習慣作客打波，經常轉場。內地人今日喺北京，聽日喺南京，搵食都係要周圍走，只不過香港細，以前慣咗最遠就係九龍過海香港，後「滬港通」年代，你冇咁舒服，唔一定要返大陸，你有本事，做到去巴黎都得，但係如果諗住喺香港過世，你要預咗好唔高興。