已經返唔到轉頭 - 方卓如

2014年10月16日 - 信報

寫咗兩個星期佔領，估唔到日日有新鮮題材，長寫長有，其實都好鬼悲哀。我仲有好多聽聽埋埋嘅財經嘢可以寫，但係日日都搞到國難當前咁，我都冇心機講其他嘢。

大家有所不知，我父親未退休前係做警察，所以我自細係出入差館大，去警察會游水，隔籬鄰舍全部都係警察，細細個一齊玩的，啲老竇都係當差。我會考成績及格，攞咗個警察什麼聯誼會嘅500蚊獎學金，係我成世仔唯一一次有獎學金咁威水。所以，我對警察呢個職業有份兒時情意結。我幾歲大嘅時候唔記得乜嘢原因，有一次講咗句「差佬」，我母親即場訓示我：「你老竇都係做警察，咩嘢差佬？」我印象深刻到記到而家，自此我只會講警察。

拖入去後巷當佢係古惑仔揼一鑊，講真，我好同情警察，罪魁禍首係個政府。你明玩班示威嘅市民，想拖到佢哋意志消磨，煽動市民內鬥，搞到警察前面畀市民鬧，後面畀古惑仔笑，你叫當差嘅將來點做嘢？

我好同情警察

黑白兩道以後都睇唔起又唔驚警察，呢個城市仲可以點管治？政府一手玩殘自己的警隊，全世界未見過一個政府可以恐怖到呢個程度。

中央政府相信特區政府可以妥善處理佔領事件，呢兩個禮拜就見到特區政府連環錯誤地處理，單單呢條辜負中央政府信任、從而搞散咗香港嘅大罪，有排同你計。

話咗香港而家就係忍無可忍四個字可以概括晒，連大台記者都忍無可忍要出聯署聲明。佢哋想做好新聞工作，但高層搞到成個維穩台，畀街坊日日冷嘲熱諷，相信記者們都唔好受。

而家終於輪到佢哋忍無可忍要開名反抗，可想而知成個社會忍無可忍嘅氣氛有幾嚴峻。我而家戥佔中三子慘，家陣嘅場面絕對唔係當初佢哋所諗嘅，好多走出嚟唔妥政府嘅人分分鐘從不支持佔中，就算當日三子唔宣布啟動佔中，今日相信都會有咁多人畀政府迫到佔領金銅旺。佢哋一宣布佔中，而家就入晒佢哋數。

所以話，政治嘅嘢唔到你有預設劇本，冇嘢係你全部預計之內。中央有一句講得好啱，佔領運動之後，受苦嘅只會係香港人。我一早都講，香港唔會有事，但香港人就會好大鑊，而家已經唔係學生返番屋企就可以當冇事發生過。

有冇睇Matrix？食咗粒藥丸醒咗之後，你條命就冇得返轉頭。