2014年10月13日星期一

四個字:忍無可忍 - 方卓如

2014年10月13日 - 信報

前晚同平時非常關心社會的朋友聚會,唔使講梗係講到而家佔領運動點收科。有個非常熱心嘅朋友,好早期已經走出嚟撐學生,催淚彈都食過。佢話,當晚好多市民頂唔順封鎖,走出夏慤道,群情洶湧,但當戴耀廷話佔中提早正式啟動,下面啲人噓聲散晒,唔鬼睬佢,就係咁,煲咗成年半嘅佔中劇本,喺佢宣布啟動時就已經立即玩完,迅速變成歷史事件,你話係咪好鬼諷刺兼反高潮。

今次大鑊得過分

而家已經唔係佔中,係兩年嚟政府三番四次侮辱市民一次過大爆發,忍無可忍。對,呢四個字就而家全香港人嘅心底話,個個都忍無可忍。瞓喺街嘅唔在講,瞓咗咁耐,等政府做啲嘢回應,但政府日日就係叫你快啲走,忍無可忍。香港而家日日塞車,個個要灣仔行去中環,一班坐慣車,雙腳只係用嚟上落車嘅商人,嬲到爆,忍無可忍。警察日日陪你企,又要俾人鬧,磨拳擦掌,忍無可忍。政府,兩個政府都係,睇住你班人愈來愈得戚,敬酒唔飲飲罰酒,忍無可忍。一個全城人忍無可忍嘅城市,別無他途,就係要嚟一鑊勁嘅。咁嘅勢頭,點可以叫人樂觀,結局一定係大家唔想見到。

我朋友話香港人見過幾次大時代,89、97、03、12,但呢一次就大鑊得過分。香港以後會唔同晒,一路以嚟慢慢改變嘅事情,隨時一日變天。令你忍無可忍的事情,變得更加密集。要建立一個城市,要長年累月,但原來玩殘一個城市,兩年就可以搞掂。好多人今次走出嚟係因為愛呢個城市,想救呢個城市。但點知,仲放咗隻怪獸出嚟食人,大肆破壞城市。香港人避咗好多劫,原來避唔到一世。

沒有留言:

發佈留言