2014年10月29日星期三

窮得只剩下錢 - 方卓如

2014年10月29日 - 信報

呢句說話唔知係邊個講先㗎呢?用嚟形容絕對空虛、市儈、物質到爆嘅人類,真係啜核貼切到不得了。香港其實老早窮得只剩下錢,因為除咗搵錢之外,你喺呢處地方根本冇嘢好做。而且搵錢都只係剩番一條路,你做嘅嘢同股票冇關就已經冇得點畀你搵錢。就算最不吃人間煙火嘅大狀,要搵大錢,都係要幫有大把股票喺手嘅人打官司,你話呢個社會幾咁傾斜。澳門靠賭為生,香港咪一樣,只不過個賭場冇房留畀你瞓之嘛。

不過,呢行好快都唔到你香港人做,到香港人被迫離有關股票嘅所有工序之後,咁香港人就真係只可以做服侍有錢人的手作仔行業,例如廚師、花王、司機。

百幾年前(即係你阿爺個阿爺嗰代),有個唔好聽嘅代名詞,咪就係叫做奴隸囉。香港人正在畀人迫走,唔係講笑㗎。

呢個現象,香港以前都發生過。我哋班四五十歲嘅中坑(寫這句時我眼角都有一滴眼淚),當年入行時,有不知幾多鬼佬喺度做我哋老細,我哋可以上得咁快,係因為我哋迫走咗佢哋。唔係我哋叻,係因為我哋識睇中文。整整吓,鬼佬走晒,到我哋威。我哋自己都識講,有啲位鬼佬做唔到,都係因為中文咋,你估你曉飛咩。

內地人慢慢取代港人

今時今日,我哋就印印腳,到我哋啲細路畀人迫走喇,呢啲真係父債子還。而家你間間公司都有啲內地人,唔係因為佢哋平,亦唔係因為要討好佢老竇,而係應驗番你當年嗰句:「有啲位香港人做唔到。」問你死未?有關股票嘅工序的確有啲技術含量,但內地人拆你架飛機開嚟慢慢研究,已經識得砌番出嚟,唔使你幫。中國整航空母艦都係用呢招,點會學唔識你香港至耍家嗰套?

「滬港通」就係航空母艦最後副核子動力引擎,只要證券市場通埋,遲早就會由內地全面主導股票周邊工序,香港人想再參與,首先就要將自己變成內地人。你唔混入其中,冇得你玩。

香港人如果仲想參與呢個「媽劇」,就要諗自己有啲乜嘢人哋冇,或者唔夠你多,唔夠你好。你問我,我其實日日都喺度諗緊。你阻止唔到世界向某一邊傾斜?但你可以指使自己走向傾斜嗰一邊,只要你唔好陷害另一邊就得喇。

沒有留言:

發佈留言