睇你匿得幾耐 - 方卓如

2014年9月29日 - 信報

有冇睇套戲，叫V for Vendetta？未睇？快啲睇，極權政府就係咁樣對付人民，要你哋臣服，要你哋驚。極權政府係如何上台的？對唔住，好多時候都是靠選舉上台。選完之後，就有資源鞏固自己權力，然後變成選舉都奈佢唔何嘅極權。

政權來自民怨　可謂創舉

香港從來冇選舉，但反而因為冇選舉，冇政府夠膽打橫行。而家你是否覺得政府唔驚你？所以佢講乜都得，做乜都得。講大話又得，硬上弓又得。但弊在佢愈搞到民憤四起，佢坐得愈穩。一個政府的政權來自民怨，可謂創舉。

好多人話而家香港唔似以前香港，係呀，係有系統地改變香港，一直進行，到現在無法掩飾，浮上水面，又或者係已經毋須掩飾，畀你知道又如何，你可以點？有冇睇《千與千尋》？成枱餸任你食，食到你變成豬，變成豬最後梗係要劏你，仲使同你客氣？

一個政權要激起民憤，單靠自己做唔嚟，要幫兇。幫兇有兩種，知道自己做緊壞事，同覺得自己做緊好事。前者仲有得救，因為是非黑白好清楚，假以時日幫兇都有機會頂唔順。後者就死梗咯，因為呢個世界已經變成是非不分，等於人類同喪屍共存，而喪屍係唔會知道自己係喪屍，佢食人係冇錯嘅。

當你身邊又有人類又有喪屍，你就要問自己企喺嗰邊，政權要人做幫兇，你可以選擇唔做。你唔親近政權係第一步，拒絕參與政權係下一步，拒絕沉默，指摘政權係再多一步。你選擇做人類，朋友可能會少咗，心情會差咗，但冇辦法，你要做一個人，這是代價。阿姆斯特丹有個Anne Frank博物館，其實係佢一家逃避納粹德軍嘅屋，內藏暗格。佢最後捱唔到，畀德軍捉入集中營。你而家匿喺屋企睇電視好爽，小心冇幾耐，你都變成Anne Frank。