評論人哋評論 - 方卓如

2014年10月10日 - 信報

噚日喺中環一個聚會，見到一個識咗近二十年嘅中環人。佢喺中環返工，住喺港島區，公司樓下條路就已經係封晒，佢而家喺馬路周圍行去邊都得。佢有句金句好鬼死好笑，佢話：「好似搞搞吓而家慣咗。」問你怕未？

蛇有蛇路，鼠有鼠路，條路唔通就自然識搵第二條路。整整吓慣晒係香港人能屈能伸嘅本能，但有時亦係自掘墳墓嘅魔咒。例如有人畀錢買人去遊行，畀錢收錢嗰個都知呢啲嘢唔馨香，唔係怕乜走出嚟大聲認？但你睇香港人，慢慢已經慣咗，覺得「係咁㗎啦佢哋，公價三百吖嘛」。麻木就係最強的腐蝕性液體，慢慢腐蝕你嘅價值觀，變成同流合污。要醒，話畀自己聽呢啲係錯，就要夠大聲喝，夠大力摑，摑到你痛。而家摑到郭富城都要坐地鐵，仲唔醒晒？

林鄭話唔傾，即係政府話畀人知佢都攞香港人嚟做籌碼，而家鬥晒冷。晒乜嘢冷？咪鬥支持同唔支持嘅邊邊人多，邊邊大聲囉。而家佔領者更加冇退路，如果政府連傾都唔制，即係乜嘢成果都冇，退，就真係全面投降。社會賢達勸佔領者撤退，都加句要雙方坐低對話。而家政府連好心勸交嘅社會賢達都唔睬，將佢哋個個變晒傻仔，最後嘅朋友都踢走埋。決定唔傾，喺5000萬事件之後發生，會令人有咩感覺？似唔似綁犯被包圍，走投無路，一於撕票，玉石俱焚，攬住一齊死？諗起都有啲心寒。

建制派幫拖請專業少少

事先聲明，5000萬事件我冇詳細睇過任何報載文件，只係憑做咗幾十年人，喺財經界打滾咗一段日子，用眼見過嘅活生生案例作一個比較。比較之後有乜結論？評論件事，唔夠獨特，評論人哋如何評論件事，先至荒謬。建制派政客就算想設法淡化事件，幫拖都唔該專業少少，唔好肉酸到講成件事喺商界好普遍，好似碎料咁樣。

唔信你叫記者去問吓律師會會計師會會長，睇吓佢哋以專業人士眼光，接觸咁多收購過程中嘅畀錢安排，究竟呢次5000萬事件是否通街都係、非常普遍？佢哋淨係問幾條問題就得，乜都唔使講──稅局知唔知？清盤人知唔知？喺正常嘅交易中，呢兩班人最惡，見到有錢，就好似鯊魚聞到血一樣，咬住唔放，佢哋唔會知道都唔做嘢。係唔係香港來源嘅收入？張約喺邊度簽？錢喺邊度收？你喺邊度返工？錢呢樣嘢，殺傷力大過僭建好多。僭建拆咗就唔存在，但錢收咗就算你使晒都係收咗。咁多疑問存在，喺正常嘅商界都唔多出現。

但公道啲講，喺商界就算出現咗，可能畀番錢，罰番錢，就當冇事。但入咗政界，唔係錢就可以搞掂囉。而家你知點解從商嘅人咁抗拒從政，成身都係炸彈，是但畀人撳一個你都死。萬一有個綁匪真係見走投無路，要引爆炸彈、攬住一齊死，你驚唔驚？該唔該煨？社會賢達唔該做吓好心，當個談判專家。勸有炸彈喺身嗰個呀，唔好勸錯。