應該點做，你懂的 - 方卓如

2014年10月7日 - 信報

社會賢達陸續走出來勸佔領人士撤離，講到口水都乾；加上每晚都有「今晚清場」的消息傳出，狼來了咁多日，軟硬兼施，都叫唔走瞓喺街嘅人，證明佢哋嘅意志同決心，唔係嗰啲上晒岸、印印腳嘅賢達可以體會。

歧視條例諮詢逐條驗

喺呢個時候，如果賢達係為香港人着想，就好應該捨難取易，掉番轉頭同佢哋最friend嘅特首傾吓偈，勸佢放下身段，唔好死頂。尤其係董伯伯，一直係心地好的慈祥長者，而且又一手捧起特首，撐佢到今時今日。

如果董伯伯有憐憫之心，好應該搵啱對象，勸人都要勸啱嘴型，唔係就變咗做騷。

噚日真係長假期之後第一日返工，中學又復課，中環灣仔真係體現到塞到爆。

未算，咁塞，政府仲要喺駱克道鑽地整呢整路，荒你唔死。

政府就係要用全香港人做陪葬，同你死過。其實呢啲都唔係新聞，政府攞香港人條命較飛都唔係第一次。

最近網上傳得最行的歧視條例諮詢文件，就畀網民踢爆係將內地人變貴族。呢份諮詢文件出咗3個月，都冇乜人講，但係而家全部人變晒政客上身，逐條逐條同你驗屍咁驗。

今次香港人覺醒運動，真係全面到不得了，以後有兩樣嘢一定會發生。

香港人全面覺醒

第一，所有鬼鼠政策唔會有機會畀你側側膊，一定同你嘈到拆天。

第二，示威遊行佔領已經變成常規機動化，以前遊行畀你封幾條行車線，迫到人發忟憎。以後？衝出去開路就開路，唔怕警察。政府以後想推政策，仲有乜嘢能量？政府其實同廢咗冇分別，社會賢達冇理由唔知。如果想香港好，應該點做，你懂的。