2014年10月6日 - 信報
我同而家啲大學生同樣年紀嘅時候，正值六四。當年我同佢哋一樣咁熱血，同啲唔識嘅同學攞住大聲公上街遊行，又罷課，同而家一樣。當然，水準同而家啲大學生差好遠，烏合之眾，行完罷完跟住就冇咗件事，冇帶來任何改變。而家啲大學生年輕人，唔使組織，仲識自發分工執垃圾洗廁所，分分鐘喺屋企都唔使做咁多家務，激鬼死佢哋啲老豆老母。批評學生搞亂香港又俾人煽動嘅老鬼，唔該你走落去自己望下，如果你個仔咁生性又咁識諗，你真係安樂晒。
當年我大學時望住電視機全程睇六四事件，演變過程同而家何其相似。佔領，政府冇動作，市民自發支持，與官對話，佔領地有人結婚，傾唔埋，《人民日報》社論，之後嘅我唔想再講。但同25年前唔同，而家中國富裕好多，自信心強好多。25年前，首都發生事件威脅到政權，而家在特區發生嘅事對政權冇威脅。25年前，中國正在起步，而家中國已經位列國際領袖。喺MK講唔啱可以講打，喺中環講唔啱只可以出律師信告，做嘢方法文明過25年前多多聲。既然講明要堅定落實一國兩制，就唔會做嘢搞到變成一國一制。況且香港唯一嘅價值，就係因為一國兩制，如果真係變咗個直轄市，對中國有鬼用。當年喺北京有年輕人犠牲，對成個中國嚟講係失去咗一些人。如果今次年輕人要犠牲，對香港嚟講就係冇咗一代人！呢個代價，冇人擔當得起。如果政府係負責任嘅，就唔該做番啲令人覺得係實際回應嘅嘢，用行動令年輕人撤離，而唔係淨係得把口喺電視播錄影帶，尤其是你把口已經唔work。
雷鼎鳴教授話佔領運動令香港損失3000幾億，等於每個市民唔見咗差唔多5萬蚊。咁即係話，如果冇佔領運動，每個市民其實呢幾日都有5萬蚊賺，你問下自己，有冇試過幾日賺5萬，冇搵咁多係咪代表一係呢位教授亂咁噏，又或者係佢計得啱，只不過呢5萬蚊畀第二啲人賺埋你嗰份，落晒人哋個袋。如果係後者，咪就係學生要佔領嘅理由囉。你要回復嘅正常生活原來係咁唔正常，咪更加要學生幫手佔領去扭轉畸形社會囉。佔領運動究竟有幾多經濟損失，連財爺都話計唔到，冇數據，點知教授原來仲勁過財爺，手上資料連政府都冇，佩服。學者要做打手，都唔該專業少少，而家香港人被訓練到醒目晒，獨立思考能力好高。亂咁噏嚇人擦鞋做打手，而家要出多啲力，求其博大霧會幫倒忙。
這次運動令我哋呢班熱血過又凍咗落嚟變成好鬼苟且嘅中年男人又再熱血番晒，直情好似少林足球咁，啲師兄弟返晒嚟。噢，少林足球其實係寫實劇，我們錯怪了它無厘頭，士巴拿Sir真係存在，只不過換咗把生果刀。運動令我好大醒覺，看清身邊啲牛鬼蛇神，免我於將來被他們陷害。我對文字本已失去熱誠，覺得寫字無用，邊有人睇。但最近我在網上讀到大量寫得有理有節令人動容的真摯文章，我睇到眼濕濕，想喊，寫字原來係有用。我想知道邊個咁夠薑，第一個頂唔順警員嘅封鎖，走出夏慤道。你知唔知道，你的一小步，係香港的一大步。
沒有留言:
發佈留言